ოფიციალურად: "ნაპოლის" ახალი თავკაცი ცნობილია

იტალიურმა "ნაპოლიმ" ოფიციალურად დაადასტურა, რომ გუნდის ახალი მთავარი მწვრთნელი რუდი გარსია იქნება.

"პარტენოპეის" მესაჭეობას სხვა კანდიდატებს უფრო აქტიურად უწინასწარმეტყველებდნენ, ამიტომ ამ ინფორმაციას ერთგვარი მოულოდნელობაც კი შეიძლება ვუწოდოთ.

გარსია ბოლოს არაბულ "ალ-ნასრში" მუშაობდა. გუნდი მან ამა წლის დასაწყისში დატოვა.

რუდი წარსულში წვრთნიდა "რომას", ლიონის "ოლიმპიკს", მარსელის "ოლიმპიკსა" და სხვა ცნობილ გუნდებს.

59 წლის სპეციალისტს სამწვრთნელო კარიერაში ორი ტიტული აქვს მოგებული. 2010/2011 წლების სეზონში მან "ლილს" ლიგა 1 და საფრანგეთის თასი მოაგებინა.