გიორგი ჩაკვეტაძე უოტფორდიდან წავა, ქართველს 2 მსურველი ჰყავს

ინგლისურ მედიაში იწერება, რომ „ლესტერ სიტი“ გიორგი ჩაკვეტაძის გადაბირებას განიხილავს და ის ბილალ ელ ჰანუსის შესაძლო შემცვლელად მიიჩნევა – ინფორმაციას Footballleagueworld ავრცელებს.

„ლესტერმა“ პრემიერლიგა დატოვა და მომავალ სეზონს ჩემპიონშიფში დაიწყებს. გუნდში ცვლილებები მოსალოდნელია – მედიაში ვარაუდობენ, რომ რამდენიმე ფეხბურთელი ახალი სეზონის დაწყებამდე კლუბს დატოვებს, მათ შორის ბილალ ელ ჰანუსი, რომელიც გასულ სეზონში ერთ-ერთი ლიდერი იყო.

ჰანუსის წასვლის შემთხვევაში, ჩაკვეტაძე ერთ-ერთი მთავარი კანდიდატია მის პოზიციაზე. საქართველოს ნაკრების ნახევარმცველმა მიმდინარე სეზონი „უოტფორდში“ ჩაატარა და თავი სტაბილური თამაშითა და შედეგიანობით გამოიჩინა. 10-იანის პოზიციაზე ის ერთ-ერთი მთავარი ალტერნატივაა და მისი დამატება „ლესტერისთვის“ ძალზე პერსპექტიულ გადაწყვეტილებად ფასდება.

ჩაკვეტაძე გასულ სეზონში „უოტფორდის“ ერთ-ერთი გამორჩეული მოთამაშე იყო – ტრავმამდე, რომელიც სეზონის ბოლოს მიიღო, გუნდის ერთ-ერთი ლიდერი გახლდათ. ბრიტანული გამოცემების შეფასებით, მისი არყოფნა გუნდს ძვირად დაუჯდა. ქართველი შემტევი სისწრაფითა და ტექნიკით ჩემპიონშიფის ერთ-ერთ ყველაზე სახიფათო მოთამაშედ ჩამოყალიბდა. Footballleagueworld-ის ცნობით, მისით დაინტერესება პრემიერ ლიგის კლუბმა „ვულვერჰემპტონმაც“ გამოხატა.