როგორი იქნება საქართველოს XI ალბანეთთან მატჩში

საქართველოს ნაკრები ერთა ლიგის B ლიგის ჯგუფური ეტაპის მეორე ტურის მატჩში ალბანეთს სტუმრად დაუპირისპირდება. "ჯვაროსნებსაც" და "არწივებსაც" პირველ ტურში მოგებული აქვთ, ამიტომ ეს შეხვედრა ჯგუფის ფავორიტების ჯახადაც უნდა შევრაცხოთ.

ცხადია, ყველას აინტერესებს, თუ რა თერთმეტეულს გამოიყვანს ვილი სანიოლი აღნიშნულ შეხვედრაში. თუ უძველეს საფეხბურთო ლოგიკას გავყვებით, რომლის მიხედვითაც გამარჯვებულ შემადგენლობას არ ცვლიან, ტირანაში ასეთი XI უნდა ვნახოთ.

მეკარე: გიორგი მამარდაშვილი

დაცვა: გიორგი გველესიანი, გურამ კაშია, ლაშა დვალი

ნახევარდაცვა: ოთარ კაკაბაძე, გიორგი ჩაკვეტაძე, გიორგი ქოჩორაშვილი, ოთარ კიტეიშვილი, ლუკა ლოჩოშვილი

თავდასხმა: ხვიჩა კვარაცხელია, გიორგი მიქაუტაძე

ამას გვაფიქრებინებს ისიც, რომ ჩეხეთთან მატჩში კაკაბაძე, მიქაუტაძე, კიტეიშვილი და ჩაკვეტაძე სანიოლმა მოედნიდან ნაადრევად გაიყვანა, რათა მათი ენერგია მომდევნო შეხვედრისთვისაც შემოენახა.

ვფიქრობ, ერთადერთი, რისი შეცვლაც შეიძლება დიდად მოულოდნელი არ იყოს, მარცხენა ვინგბექის პოზიციაზე ლოჩოშვილის ირაკლი აზაროვით ჩანაცვლებაა, ისევ და ისევ მეტოქის სპეციფიკიდან გამომდინარე, თუმცა "კრემონეზეს" მცველმა ჩეხეთთან იმდენად კარგი შთაბეჭდილება დატოვა, რომ მისი სათადარიგოთა სკამზე გადასმა მაინც გაჭირდება.

შეგახსენებთ, რომ ალბანურ-ქართული ჯახი თბილისის დროით 22:45 საათზე დაიწყება.