“აი, რატომ ვერ მოიგებს ხვიჩა ოქროს ბურთს..” - რას წერს გამოცემა Goal

ხვიჩა კვარაცხელიამ „პარი სენ-ჟერმენთან" ერთად მორიგი ტიტული მოიგო. 12 აგვისტოს უეფას სუპერთასის მატჩში ლუის ენრიკეს გუნდმა „ასტონ ვილა" 2:1 დაამარცხა, ხოლო ხვიჩა კვარაცხელიამ თავი გოლით გამოიჩინა და მოედანზე კვლავ ერთ-ერთი საუკეთესო გახლდათ.

ქართველი ფეხბურთელი 2026 წლის „ოქროს ბურთის“ მოგების ერთ-ერთ მთავარ კანდიდატად განიხილება და სწორედ ამ საკითხთან დაკავშირებით ცნობილმა გამოცემა Goal.com-მა ხვიჩას ვრცელი სტატია მიუძღვნა. გამოცემის ვარაუდით, კვარაცხელია 2026 წლის„ოქროს ბურთს“ ვერ მოიგებს, თუმცა დღეს ის მსოფლიოში საუკეთესო მოთამაშეა.

„პარი სენ-ჟერმენმა ოთხშაბათს მორიგი ტიტული მოიგო, სუპერთასის მატჩში მათ „ასტონ ვილა" 2:1 დაამარცხეს, ხოლო პარიზელთა მხრიდან გამორჩეული კვლავ ხვიჩა კვარაცხელია იყო. მან ანგარიში მე-20 წუთზე შორიდან მოულოდნელი და შთამბეჭდავი დარტყმით გახსნა. დეზირე დუემ საჯარიმოს მეორე მხარეს მყოფ კვარაცხელიას ბურთი მიაწოდა, ქართველმა კი ორი სწრაფი შეხებით მეტი კეშის მოტყუება მოახერხა, შემდეგ კი მარჯვენა ფეხით ისეთი ძლიერი დარტყმა შეასრულა, რომ „ასტონ ვილას“ მეკარე მარკო ბიზოტმა ხელის გაწევაც კი ვერ მოასწრო, ბურთი უკვე კარში იყო. ასეთი ბრწყინვალების ჩვენება ძალიან ცოტა ფეხბურთელს შეუძლია, თუმცა კვარაცხელიას მსგავსი მომაკვდინებელი დარტყმების შესრულება ნებისმიერ მომენტში შეუძლია. ის ორივე ფეხით დაუნდობელი დამამთავრებელი ფაზის მოთამაშეა და მცველებს სრული სისწრაფით უტევს, თან ბურთზე სრულ კონტროლს ინარჩუნებს. ამას ის ისეთი ელეგანტურობით აკეთებს, რომლის ყურებაც უდიდეს სიამოვნებას გვანიჭებს.

„ვილამ“ უბრალოდ ვერ შეძლო მასთან გამკლავება. კვარაცხელია ბურთით მუდმივ საფრთხეს წარმოადგენდა, მის გარეშე კი მეტოქისთვის მუდმივი თავსატეხი იყო. ქართველმა ფეხბურთელმა მოედანი 88-ე წუთზე დატოვა და მის ანგარიშზე სამი წარმატებული დრიბლინგი, სამი დარტყმა, ხუთი მოგებული ორთაბრძოლა და მეტოქის საჯარიმოში ცხრა შეხება იყო.

ხვიჩა კვარაცხელია 2026 წლის „ოქროს ბურთს“ ვერ მოიგებს, მაგრამ ამას რეალურად მნიშვნელობა არ აქვს. თუ მხოლოდ თვალის შეფასებით ვიმსჯელებთ, დღეს ფეხბურთში არც ერთი სხვა მოთამაშე იმავე დონეზე არ თამაშობს, როგორც ის.

ამას უკვე თითქმის ოთხი წელია აკეთებს. ის სრულიად უცნობი იყო, როდესაც „ნაპოლიმ“ 2022 წლის ზაფხულში ბათუმის „დინამოდან“ მხოლოდ 12 მილიონ ევროდ შეიძინა, თუმცა ძალიან სწრაფად იქცა საუკუნის ერთ-ერთ საუკეთესო გარიგებად და იტალიურ კლუბს 33-წლიანი პაუზის შემდეგ სკუდეტოს მოგებაში დაეხმარა. იმ სეზონში კვარაცხელიამ 34 მატჩში 25 საგოლე მოქმედება შეასრულა და სერია A-ს საუკეთესო ფეხბურთელის ჯილდოც დაიმსახურა.

„ნაპოლის“ გულშემატკივრებმა მას სიყვარულით „კვარადონა“ შეარქვეს. ეს მეტსახელი კლუბის საყვარელ ლეგენდას, დიეგო მარადონას, უკავშირდება. თავისი აფეთქებადი თამაშის სტილით, დაბლა დაწეული წინდებითა და საკუთარ შესაძლებლობებში ურყევი თავდაჯერებით კვარაცხელია გულშემატკივართა ერთ-ერთ მთავარ სანახაობად იქცა.

გასულ სეზონში პსჟ გახდა მხოლოდ მეორე გუნდი, რომელმაც 1992 წელს ევროპის თასის ჩემპიონთა ლიგად გადაკეთების შემდეგ ტიტულის დაცვა შეძლო. კვარაცხელიამ კი დამაჯერებელი და შთამბეჭდავი თამაშით უსწრაფესად დაჩრდილა უსმან დემბელე და კონტინენტის ყველა სხვა ფეხბურთელი. მან 16 მატჩში 17 საგოლე მოქმედება შეასრულა და გახდა პირველი ფეხბურთელი, რომელმაც ერთ ჩემპიონთა ლიგის სეზონში ზედიზედ შვიდ პლეი-ოფის მატჩში გოლი ან საგოლე გადაცემა მიითვალა.

განსაკუთრებით მნიშვნელოვანი იყო მისი მოპოვებული პენალტი „არსენალთან“ ფინალში. პარიზელები 0:1 მარცხდებოდნენ და გუნდი თამაშის რიტმს ვერ პოულობდა, როდესაც შეხვედრის 60-ე წუთის შემდეგ კვარაცხელიამ ზურგით კარისკენ მდგომმა ბურთი მიიღო. ის „არსენალის“ რამდენიმე მცველმა ალყაში მოაქცია, თუმცა ქართველმა მათ თავი დააღწია, დემბელესთან ორმაგი პასი გაითამაშა და შემდეგ სხეულის მოძრაობით კრისტიან მოსკერას მოტყუება მოახერხა. ეკვადორელმა მცველმა ფეხი მოუქნელად გაიწოდა და კვარაცხელია წააქცია, რის შედეგადაც პსჟ-მ პენალტი მიიღო. დემბელემ თერთმეტმეტრიანი გაიტანა, ანგარიში გაათანაბრა და პარიზულ გუნდს კიდევ ერთი ტიტულისკენ მიმავალი გზა გაუხსნა.

თუმცა, კვარაცხელიას ყველაზე დასამახსოვრებელი მატჩი ჩემპიონთა ლიგის ნახევარფინალის პირველი შეხვედრა იყო „ბაიერნის“ წინააღმდეგ. პსჟ-მ „პარკ დე პრენსზე“ ცხრაგოლიან კლასიკურ დაპირისპირებაში გაიმარჯვა - მატჩში, რომელიც შესაძლოა ჩემპიონთა ლიგის ისტორიაში ერთ-ერთი ყველაზე სანახაობრივი და მაღალი ხარისხის შეხვედრა ყოფილიყო. კვარაცხელიამ და დემბელემ ორივემ დუბლი შეასრულეს, პარიზელებმა კი 5:4 მოიგეს.

შთამბეჭდავი მატჩების შემდეგ ხვიჩა კვარაცხელია დამსახურებულად გახდა ჩემპიონთა ლიგის 2025/26 წლების სეზონის საუკეთესო ფეხბურთელად.

სამწუხაროდ, მიუხედავად ამისა, კვარაცხელია წელს „ოქროს ბურთის“ მთავარ ფავორიტად მაინც არ განიხილება. საქართველოს ნაკრების ფეხბურთელს ხელს შეუშლის საკლუბო დონეზე არცთუ გამორჩეული სეზონი, რომლის დროსაც მან ლუის ენრიკეს გადაწყვეტილებით ლიგა 1-ში მხოლოდ 20 მატჩი დაიწყო ძირითად შემადგენლობაში. ესპანელი მწვრთნელი რეგულარულად ასვენებდა თავის მთავარ ფეხბურთელებს, რათა პრიორიტეტი ჩემპიონთა ლიგაზე წარმატებისთვის მიენიჭებინა.

პსჟ-ს შემადგენლობაში კვარაცხელიამ ადგილობრივ ტურნირებში ჯამში მხოლოდ 12 საგოლე მოქმედება დააგროვა, თუმცა გუნდს ზედიზედ მეხუთე ლიგა 1-ის ტიტულის მოგებაში დაეხმარა. ეს მაჩვენებელი საკმარისი არ იქნება იმისთვის, რომ ის „ოქროს ბურთის“ მთავარ კანდიდატებს წინ აღუდგეს, მაშინაც კი, თუ მის საოცარ ჩემპიონთა ლიგის სეზონს გავითვალისწინებთ", - წერს გამოცემა ხვიჩა კვარაცხელიაზე.