"ვიცი, რომ კრიტიკა იქნება" - რამაზ სვანაძის კომენტარი მატჩის შემდეგ

ერთა ლიგის მესამე ტურში უნგრეთმა პუშკაშ არენაზე საქართველოს ნაკრებს უმასპინძლა.

მატჩი უნგრელთა გამარჯვებით 1:0 დასრულდა.

შეხვედრის შემდეგ ჩვენი გუნდის მთავარმა მწვრთნელმა, რამაზ სვანაძემ მედიასთან ისაუბრა.

"რა თქმა უნდა, მარცხმა ყველას გული დაგვწყვიტა, თუმცა არ შეიძლება მომავალს ოპტიმისტურად არ ვუყუროთ. რთულ დროს მომიწია საქართველოს ნაკრების ჩაბარება, მაგრამ აქ მუშაობა და მწვრთნელობა ძალიან დიდი პატივია. 

"რამაზ სვანაძეს თავის ცხოვრებაში არასდროს ჰქონია ისეთი სამუშაო, სადაც მიზნისთვის ვერ მიუღწევია. გარწმუნებთ ყველას, რომ ძალიან მალე, ძალიან მოკლე დროში ჩადგება თავის კალაპოტში და ვიბრძოლებთ მიზნისთვის, რაც არის ევროპის ჩემპიონატზე გასვლა. 

"ერთა ლიგის გარდა, კიდევ გვექნება შანსი საკვალიფიკაციო ეტაპზე და კიდევ მომეცემა დრო, რომელიც აუცილებელია ყველა მწვრთნელისთვის, რომ გუნდს თავისი ხელწერა დაატყოს. გვაქვს ბევრი პოზიტიური მომენტი, მაგრამ ბევრი რამ არის გამოსასწორებელი, რისთვისაც დრო გვჭირდება. 

"მესმის, რომ ეს საქართველოს ნაკრებია, ისიც ვიცი, რომ კრიტიკა იქნება, მაკრიტიკონ, წერონ რაც უნდათ, ჩვენც ვილაპარაკოთ ერთმანეთში, უბრალოდ, კითხვები უნდა იყოს ისეთი, რომელიც ფეხბურთს შეეხება. სამ დღეში კიდევ შევხვდებით ერთმანეთს და გპირდებით, რომ ასეთ ხასიათზე პრესკონფერენციაზე არავინ ვიქნებით", - თქვა სვანაძემ.