ბოლო წუთზე მოგება ყოველთვის ძალიან სასიხარულოა, მაგრამ... - ვილი სანიოლი პოლონეთთან გამარჯვებაზე

პოლონეთის 21-წლამდელთა ნაკრებთან ევრო 2025-ის პირველ შეხვედრაში (2:1) გამარჯვების შემდეგ, საქართველოს პირველმა არხმა კომენტარი ეროვნული გუნდის მთავარ მწვრთნელს, ვილი სანიოლს ჩამოართვა, რომელიც სლოვაკეთში შეხვედრას ესწრებოდა.

„გამარჯვება მოვიპოვეთ და ეს ყველაზე მთავარია. პოლონეთთან რთული მატჩი იყო, მაგრამ საქართველოს 21-წლამდელთა ნაკრების ფეხბურთელებს ბოლომდე სჯეროდათ, რომ მოგება შეეძლოთ და საბოლოოდ მიზანსაც მიაღწიეს. ეს მართლაც შესანიშნავი გრძნობა იყო.

ზოგადად, ყოველთვის სასიხარულოა, როდესაც გოლს ბოლო წუთზე იტან და თამაშს ასე იგებ. ტურნირის წარმატებით დაწყება ძალიან მნიშვნელოვანია, თუმცა ახლა ფეხბურთელებმა ფიქრი საფრანგეთთან მოახლოებულ შეხვედრაზე უნდა დაიწყონ“, – განაცხადა სანიოლმა პირველ არხთან საუბარში.

საქართველოს ახალგაზრდული ნაკრები ევრო 2025-ის მეორე შეხვედრას 14 ივნისს კვლავ ქალაქ ჟილინას სტადიონზე გამართავს. მეტოქე საფრანგეთის 21-წლამდელთა ნაკრები იქნება. მატჩი თბილისის დროით 23:00 საათზე დაიწყება.