• 02-06-2022
    იტალია 0:3 არგენტინა - "ფინალისიმა" სამხრეთ ამერიკელებმა მოიგეს
    იტალია 0:3 არგენტინა - "ფინალისიმა" სამხრეთ ამერიკელებმა მოიგეს
    Aa

    "უემბლიზე" დღეს შედგა არტემიო ფრანკის თასის რიგით მესამე გათამაშების ფინალური ჯახი, რომელშიც კოპა ამერიკის ჩემპიონმა არგენტინამ ევროპის ჩემპიონი იტალია დაჯაბნა, ანგარიშით 3:0.


    გარდამავლი უპირატესობით დაწყებულ შეხვედრაში ანგარიში 28-ე წუთზე გაიხსნა - ლეო მესის ჩინებული დრიბლინგითა და გადაცემით ლაუტარო მარტინესმა ისარგებლა. "ელ ტოროსთვის" ეს "ალბისელესტეს" მაისურით გატანილი მე-20 გოლი იყო. ამ ნიშნულზე ლაუტარო სულ 38 შეხვედრაში ავიდა, რაც შთამბეჭდავი მაჩვენებელია.


    გაშვებულმა გოლმა "სკუადრა აძურა" ვერ გამოაცოცხლა. არგენტინელები მეორე გოლის გატანასთან გაცილებით ახლოს იყვნენ, ვიდრე დიეგო სიმეონეს შეგირდები - ანგარიშის გათანაბრებასთან. საწადელს ვერცხლისქვეყნელებმა ტაიმის პირველ დამატებულ წუთზე მიაღწიეს, როცა ანხელ დი მარია ჯანლუიჯი დონარუმასთან პირისპირ გავიდა და თანაკლუბელს აჯობა. ასისტენტი ლაუტარო იყო.


    მეორე ტაიმში იტალიის თამაში კიდევ უფრო აირია. რაც შეეხება არგენტინას, სამხრეთ ამერიკს ჩემპიონთაგან ყველაზე აქტიური ლეო მესი იყო, თუმცა ოქროს ბურთის შვიდგზის მფლობელის დარტყმულებს დონარუმა იგერიებდა. რეალური შანსები ჰქონდათ ანხელ დი მარიასა და ჯოვანი ლო ჩელსოსაც.


    ის უზარმაზარი უპირატესობა, რომელიც "ალბისელესტეს" ბოლო ნახევარ საათში ჰქონდა, ანგარიშში უკანასკნელ წამზე აისახა. ლეო მესის დაწყებული შეტევა პაოლო დიბალამ ლამაზი დარტყმით დააგვირგვინა და მესამე გოლიც გაიტანა. ამ აკორდით დასრულდა მატჩიც და არგენტინამ არტემიო ფრანკის თასი ისტორიაში მეორედ (პირველად 1993 წელს) მოიგო.


    იტალიის ნაკრებს საგლოვად დიდი დრო არ აქვს - "აძური" ერთა ლიგის გათამაშებაში ერთვება, სადაც უნგრეთს, გერმანიასა და ინგლისს უნდა დაუპირისპირდეს. რაც შეეხებათ ლიონელ სკალონის შეგირდებს, ივნისში მათ ესტონეთთან აქვთ ამხანაგური შეხვედრა ჩანიშნული.

    Facebook კომენტარები