ყველა სანდო წყარომ დაადასტურა, რომ ილქაი გიუნდოგანი "ბარსელონას" ფეხბურთელი გახდება.
გერმანელი ნახევარმცველი კატალონიურ გრანდთან 3-წლიან კონტრაქტს მოაწერს ხელს.
ფაბრიციო რომანოს თქმით, ხელშეკრულება 2+1 სისტემით გაფორმდება. ესპანურ პრესას თუ დავუჯერებთ, იგი მესამე წლით იმ შემთხვევაში გახანგრძლივდება, თუ ილქაი სეზონში შესაძლო მატჩების 60%-ს ითამაშებს.
Diairo AS-ის ჟურნალისტმა ხავი მიგელმა "ბლაუგრანას" რეაქციების შესახებ გვამცნო. მისი თქმით, ჩავი ერნანდესი და სამწვრთნელო შტაბი 32 წლის შუახაზელის დამატებით ძალიან კმაყოფილია.
"ეს ჩემპიონთა ლიგის დონის გაძლიერებაა!" - ამბობენ თურმე "ლურჯ-ბროწეულისფერთა" გასახდელში.
Mundo Deportivo-ს ფერნანდო პოლომ ტრანსფერი ასე შეაფასა:
"გიუნდოგანი "ბარსასთვის" დიდებული დანამატია. უმაღლესი დონის. ნახევარმცველი, რომელიც ჩავისთვის ოთხი ერთშია: შეუძლია ნახევარდაცვის ორ პოზიციაზე თამაში, ცრუ გარემარბად და საყრდენად... და გუნდში უფასოდ მოდის!"
შეგახსენებთ, რომ "მანჩესტერ სიტის" ილქაი თავისუფალი აგენტის სტატუსით ტოვებს.