• 20-08-2022
    თბილისის "დინამომ" "დილასთან" დამაჯერებელი გამარჯვება მოიპოვა
    თბილისის "დინამომ" "დილასთან" დამაჯერებელი გამარჯვება მოიპოვა
    Aa

    კრისტალბეთ ეროვნული ლიგის 22-ე ტურის ერთ-ერთ საინტერესო მატჩს "დინამო არენამ" უმასპინძლა. თბილისის "დინამო" გორის "დილას" დაუხვდა.


    შეხვედრაში სათამაშო უპირატესობას მასპინძლები ფლობდნენ, თუმცა სერიოზული საგოლე მომენტი 32-ე წუთამდე არ ჰქონიათ. სწორედ 32-ე წუთზე დავით სხირტლაძის მშვენიერი პასით გიორგი მოისწრაფიშვილმა ისარგებლა და თავისი გუნდი დააწინაურა. გუნდები შესვენებაზე უცვლელი ანგარიშით გავიდნენ.


    მატჩის მეორე ნახევრის სტარტიდან ექვს წუთში დავით სხირტლაძემ ამჯერად თავად გაიტანა და თბილისური კლუბის უპირატესობა ორამდე გაზარდა. "დინამოს" შვიდიანს საგოლე გადაცემა იმრანმა გაუკეთა.


    სათქმელია ისიც, რომ გაშვებული ორი ბურთის შემდგომ გორელებს რამდენიმე საინტერესო მომენტი შეექმნათ, თუმცა თბილისელთა კარის დარაჯი, დავით კერესელიძე მშვენივრად გამოიყურებოდა.


    მატჩს საბოლოო წერტილი შეცვლაზე შემოსულმა გიორგი გაბედავამ დაუსვა, რომელმაც საგოლე გადაცემა ასევე შეცვლაზე შემოსული ფეხბურთელისგან, გაბრიელ სიგუასგან მიიღო. შეხვედრა 3-0 დასრულდა.


    თბილისის "დინამო" მომდევნო მატჩს "საბურთალოს" წინააღმდეგ 26 აგვისტოს სტუმრად გამართავს, "დილა" კი "სიონს" მიიღებს.


    ფოტო: თბილისის "დინამო"

    Facebook კომენტარები