ბრძოლა ევროპა ლიგისთვის: "ლივერპული" - "სევილია"

18-05-2016, 00:47

როგორც მოგეხსენებათ, 18 მაისს გაიმართება ევროპა ლიგის ფინალი, სადაც "ლივერპული" ჯეიკობ-პარკზე "სევილიას" დაუპირისპირდება. ეს შეხვედრა ამ გუნდებს შორის სათასო დაპირისპირებებს შორის პირველი იქნება. საკუთარ ჩემპიონატში ვერცერთმა გუნდმა ვერ მოახერხა განსაკუთრებული წარმატების მიღწევა, ასე რომ, ორივე კლუბი ჩემპიონთა ლიგის ჯგუფური ეტაპის მიღმაა დარჩენილი. მხოლოდ ამ ფინალის მოგებაღა დარჩათ იმისთვის, რომ მათ ჩემპიონთა ლიგაზე გასვლა შეძლონ. იმ შემთხვევაში თუ "სევილიამ" თასის აწევა ვერ მოახერხა, ისინი ევროპა ლიგის საკვალიფიკაციო ეტაპს დასჯერდებიან მომდევნო სეზონში. ესპანური კლუბი ამ ჩემპიონატის რეკორდსმენია მოპოვებული თასების რაოდენობით, რამეთუ ანდალუსიელებმა ამ ტურნირის მოგება 2006, 2007, 2014 და 2015 წლებში მოახერხეს. ახლა კი კლუბი ისტორიული შედეგის დაფიქსირებას გეგმავს და ზედიზედ სამჯერ აპირებს ევროპა ლიგის თასის აღმართვას. "ლივერპულმა" აღნიშნული თასის მოპოვება 1973, 1976 და 2001 წლებში მოახერხა. გარდა ამისა, "მერსესაიდელები" ჩემპიონთა ლიგის ხუთგზის გამარჯვებულები არიან. "წითლებმა" ევროპის 11 ფინალიდან რვაში შეძლეს გამარჯვება. თავის მხრივ, იურგენ კლოპი აპირებს არასახარბიელო ტრადიციის დარღვევას და ფინალში წარმატების მიღწევას. როგორც მოგეხსენებათ, გერმანელმა სპეციალისტმა "დორტმუნდის" რიგებში რამდენიმე საფინალო მარცხი იწვნია, ასევე "ლივერპულში" "მანჩესტერ სიტის" წინააღმდეგაც დამარცხდა ლიგის თასზე. მატჩის წინ პრესკონფერენცია იურგენ კლოპმა გამართა: "გუნდი მაქსიმუმს გააკეთებს, ეს იქნება ბრძოლა, სადაც ერთი აუცილებლად დამარცხდება. შენ ვერ ძელებ თასის აღებას ცუდი ფეხბურთის თამაშით. შენ უნდა დაანახო ყველას, რომ მზად ხარ დიდი მიღწევებისთვის. შანსები 50-50-ზეა. ფავორიტი არცერთი გუნდი არ არის.". "გუნდი ყველაფერს იზამს იმისთვის, რომ შესაძლებლობა გამოიყენოს. ეს რთულია, ვიცით. თუმცა ჩვენ 100%-ით ვართ მზად. "ლივერპული" ფინალში გასვლას იმსახურებდა. როდესაც მე აქ მოვედი, ვერ წარმომედგინა, რომ ამ სეზონში ჩვენ აქამდე მოვიდოდით. ბრწყინვალე მატჩები ჩავატარეთ, ენფილდი მუდამ ჩვენს გვერდში იყო, რამაც შედეგი ნამდვილად გამოიღო", - განაცხადა კლოპმა. თავის მხრივ, "სევილიას" მთავარმა მწვრთნელმა უნაი ემერიმ მატჩისწინა პრესკონფერენცია გამართა. "ფინალებში თამაში და ტურნირების მოგება ძალიან მაბედნიერებს და "სევილიაში" გატარებულ წუთებს კიდევ უფრო მრავალფეროვანს ხდის. "სევილია" ისტორიული კლუბია, რომელსაც მუდამ ჰქონდა კარგი მომენტები. იმედი მაქვს, რომ ხვალინდელი ფინალი მომდევნო სასიხარულო მომენტი იქნება კლუბის ისტორიაში". "გუნდისთვის ეს ტურნირი უმნიშვნელოვანესია. წარმატების შემთევავში კლუბი მის მოგებას ზედიზედ სამჯერ მოახერხებს, რაც არაჩვეულებრივი შედეგია". "ეს გამოწვევაა, როდესაც ისეთ კლუბს უპირისპირდები, როგორიც "ლივერპულია". იმედი მაქვს, რომ მომავალ სეზონში ჩემპიონთა ლიგაზე შევძლებთ თამაშს, რისთვისაც ეს ფინალი უნდა მოვიგოთ", - განაცხადა უნაი ემერიმ. შეგახსენებთ, რომ ფინალი ბაზელში, ჯეიკობ-პარკზე გაიმართება. შეხვედრა თბილისის დროით 22:45 საათზე აიღებს სტარტს.

სავარაუდო შემადგენლობები

სპეციალურად FOOTBALLNEWS.GE-სთვის მამუკა მამულაშვილი!



კომენტარის დასამატებლად გთხოვთ გაიაროთ რეგისტრაცია.

ქართული ამბები

დაგვიმეგობრდით