რონალდომ დაასახელა ყველაზე ცუდი ფეხბურთელი, ვის გვერდითაც უთამაშია

ლეგენდარულმა ბრაზილიელმა ფორვარდმა, რონალდომ ბრაზილიის ნაკრების კიდევ ერთ ლეგენდასთან, რომარიოსთან ინტერვიუში დაასახელა თავის კარიერაში ყველაზე კარგი და ყველაზე ცუდი პარტნიორები.

„საუკეთესონი იყვნენ რონალდინიო ნაკრებში და ზიდანი საკლუბო დონეზე. ზიზუს უმაღლესი კლასი ჰქონდა, ის სულ სხვა იყო, ძალიან ტექნიკური, ყველაფერს ძალიან მარტივად აკეთებდა“, – განაცხადა „ოქროს ბურთის“ ორგზის მფლობელმა.

ამის შემდეგ რომარიომ რონალდოს ჰკითხა, ვინ იყო ყველაზე ცუდი ფეხბურთელი, ვისთან ერთადაც ერთ გუნდში უთამაშია. მსოფლიოს ორგზის ჩემპიონმა „რეალის“ ყოფილი ნახევარმცველი, დანიელი ტომას გრავესენი დაასახელა.

„ის მართლაც კარგი ბიჭი იყო, ძალიან კარგი ადამიანი. მაგრამ ფეხბურთში ძალიან ცუდი იყო, თამაშობდა უხეშად და მეტოქეებს ძლიერად ურტყამდა ფეხებში“, – მოჰყავს რონალდოს სიტყვები გაზეთ Marca-ს.

ყოფილი ფორვარდის თქმით, მის დროს ბრაზილიის ნაკრებში ტექნიკურად ყველზე სუსტი იყო ამარალი – საყრდენი ნახევარმცველი, რომელმაც 1995-96 წლებში ეროვნულ გუნდში 10 მატჩი ჩაატარა.

„ის ბევრს დარბოდა, მაგრამ მეტოქეს 10-ჯერ ართმევდა ბურთს და ცხრაჯერ კარგავდა“, – იხუმრა რონალდომ.