ლივერპულის მწვრთნელი ქართველ ჟურნალისტს გაეხუმრა - ალბათ, ინგლისიდან არ ხართ, შეხედეთ ინგლისელ ჟურნალისტს

ჩემპიონთა ლიგაზე, მერვედფინალური ეტაპის პირველ შეხვედრაში ხვიჩა კვარაცხელიას პარი სენ-ჟერმენი ლივერპულს დაუპირისპირდება.

აღნიშნული მატჩისთვის პარიზში ქართველი ჟურნალისტებიც იმყოფებიან, რომლებმაც მატჩის წინ გამართულ პრესკონფერენციაზე კითხვები ლივერპულის დამრიგებელს, არნე სლოტს დაუსვეს.

ერთ-ერთი კითხვის დროს ნიდერლანდელმა სპეციალისტმა გაიხუმრა.

„ალბათ, ინგლისიდან არ ხარ, რადგან ინგლისში ხალხი ამბობს, რომ ჩვენ თითქმის ყველა ფეხბურთელს ვყიდულობთ, ვინც კი მსოფლიოში არსებობს!“

„აი, სწორედ აქ აკეთებენ ფულს ადამიანები, როგორიც ეს კაცია!“ - აღნიშნა მან და მიუთითა Sky Sports News-ის ჟურნალისტ ვინი ო’კონორზე.