მსგავსი რამ ჩემს ცხოვრებაში არ მინახავას - სომხეთის ნაკრების მწვრთნელი საქართველოსთან მატჩამდე გააოცეს

სომხეთის ნაკრებისა და „კაიზერსლაუტერნის“ თავდამსხმელი, გრანტ-ლეონ რანოსი, საქართველოსთან ერთა ლიგის საპასუხო შეხვედრამდე ეროვნული გუნდიდან წავიდა. ამის შესახებ სომხეთის ნაკრების მთავარმა მწვრთნელმა, ჯონ ვან’ტ სხიპმა, „დინამო არენაზე“ გამართულ პრესკონფერენციაზე განაცხადა.

„მინდა ავხსნა შექმნილი ვითარება ერთ-ერთი ფეხბურთელთან დაკავშირებით. გრანტ-ლეონ რანოსმა გუნდი დატოვა. მან მითხრა, რომ თუ ძირითად შემადგენლობაში არ იქნებოდა, წასვლას ამჯობინებდა.

სამწვრთნელო კარიერაში მსგავსი რამ არასდროს გამომიცდია. სასტარტო შემადგენლობის შერჩევა მხოლოდ მწვრთნელის პრეროგატივაა და არა ფეხბურთელის.

ფაქტია, რომ მან გერმანიის მეორე ბუნდესლიგაში მხოლოდ რამდენიმე წუთი ითამაშა, ამიტომ გადავწყვიტე, რომ მომდევნო მატჩში ვერ მიიღებდა მონაწილეობას“, – აღნიშნა ნიდერლანდელმა სპეციალისტმა.

საქართველოსა და სომხეთის ნაკრებების შეხვედრა 23 მარტს, თბილისში, 18:00 საათზე გაიმართება.