ვითამაშებთ თუ არა თურქეთთან მაყურებლის გარეშე - ეს ახლა მხოლოდ 1 ადამიანზეა დამოკიდებული

იმის გამო, რომ 23 მარტს, საქართველოსა და სომხეთის მატჩის დასრულების შემდეგ გულშემატკივრები მოედანზე შეიჭრნენ, ჩვენს ეროვნულ გუნდს შესაძლოა დიდი პრობლემა შეექმნას.

კერძოდ, 2024 წლის ნოემბერში, UEFA-მ საქართველოს ფეხბურთის ფედერაცია საზოგადოებრივი გასასვლელების დაბლოკვისთვის, ასევე, ფანების მხრიდან ლაზერების განათებისა და პიროტექნიკის გამოყენების გამო, ფულადი თანხით დაისაჯა, ხოლო ქართველ გულშემატკივარს გამოსაცდელად 2 წელი მისცა.

ზემოთ აღნიშნული ინციდენტის გამო დიდი ალბათობით, კვლავ დავჯარიმდებით. ამას მიემატება დასწრების აკრძალვაც, რადგან ეს ჩვენთვის მეორე გაფრთხილება გამოვა, რაც ნიშნავს, რომ 2026 წლის მსოფლიო ჩემპიონატის საკვალიფიკაციო ეტაპის მინიმუმ პირველ საშინაო მატჩს (თურქეთთან), მაყურებლის გარეშე გავმართავთ.

დიდი იმედი დავიტოვოთ, საქართველო-სომხეთის მატჩის იტალიელ დელეგატზე, მაურო ტონოლინიზე, რომელიც პასუხისმგებელია UEFA-ს დღევანდელი მატჩის დეტალები მოახსენოს.