ოსი-კვარას დუეტი არ აღდგება - ენრიკეს ოსიმენი ერთი მიზეზის გამო არ მოსწონს

პსჟ-ში ხვიჩა კვარაცხელიას გადასვლის შემდეგ, ფრანგული პრესა აქტიურად წერდა, რომ პარიზელები ზაფხულში ვიქტორ ოსიმენსაც შეიძენდნენ და ნეაპოლური დუეტი აღდგებოდა. თუმცა, არსებობს საკმაოდ ობიექტური მოსაზრება, რომ ფრანგები ნიგერიელ ფორვარდს არ გაიფორმებენ და ამის მიზეზი ლუის ენრიკეა. 

ბელგიელი ჟურნალისტი საშა ტავოლიერი წერს, რომ ლუის ენრიკეს ვიქტორ ოსიმენის ცხოვრების სტილი არ მოსწონს. ნიგერიელს ღამის კლუბებში გართობა უყვარს და ხშირად შარშიც ეხვევა ხოლმე. ამ თემაზე რამდენიმე თვის წინ სამირ ნასრიმაც ისაუბრა: 

„ლუის ენრიკემ ოსიმენის შეძენაზე უარი რამდენიმე მიზეზის გამო თქვა. მან უკვე დაბლოკა ვიქტორის ტრანსფერი. ამის მიზეზი ფეხბურთელის პირადი ცხოვრებაა, რომელიც ღამის წვეულებებს მოიცავს...“ - ამბობდა ნასრი Canal+ის ეთერში. 

ენრიკეს თავისი გუნდის სრული კონტროლი უყვარს. სატრანსფერო საკითხებსაც ის აკონტროლებს და თუ ვინმე არ მოსწონს, გუნდი მას არ შეიძენს. ვნახოთ როგორ დასრულდება ეს ამბავი და დადასტურდება, თუ არა ფრანგული პრესის მოლოდინი. თუ, ყველაფერი ასე მოხდა, პსჟ-ს ზაფხულში ცენტრფორვარდის ძიება სხვა მიმართულებით მოუწევს.