ვინც კვარას შეურაცხყოფას აყენებს, უნდა სცხვენოდეს - იტალიელი ჟურნალისტი კვარაცხელიაზე

იტალიელმა სპორტულმა ჟურნალისტმა რაფაელე აურიემამ გადაცემა Salite sulla giostra-ში ხვიჩა კვარაცხელია დაიცვა და აღნიშნა, რომ ქართველი ფეხბურთელის „ნაპოლიდან“ წასვლა სრულიად გამართლებული იყო.

აურიემას თქმით, მას შემდეგ, რაც "ნაპოლიმ" სერია A მოიგო, კლუბს "კვარასთვის" კონტრაქტი დროულად უნდა გაეხანგრძლივებინა და საგრძნობლად გაეზარდა ხელფასი — მინიმუმ 200 000 ევროთი თვეში. ჟურნალისტის თქმით, ხვიჩა იმ სეზონის გამორჩეული მოთამაშე იყო და კლუბს თავად უნდა გადაედგა ეს ნაბიჯი, ფეხბურთელის მოთხოვნის გარეშე.

„მას აღარ სურდა ნეაპოლში დარჩენა და გასაგებიცაა — რადგან მას ტყუილი უთხრეს. სწორედ მაშინ მიიღო გადაწყვეტილება, დაეტოვებინა გუნდი და პსჟ-სთან ერთად ჩემპიონთა ლიგისთვის ებრძოლა. დღემდე ვკითხულობ მტკივნეულ კომენტარებს მის მიმართ — ეს სირცხვილია. „ნაპოლის“ ხელმძღვანელობამ სიტუაცია არასწორად მართა და შედეგიც სახეზეა“, — განაცხადა აურიემამ.

შეგახსენებთ, რომ ხვიჩა კვარაცხელია ზამთარში 70 მილიონი ევროს სანაცვლოდ გადავიდა „პარი სენ-ჟერმენში“.