პირველი ინფორმაცია ოთარ კიტეიშვილის ტრავმის შესახებ ცნობილია

გრაცის „შტურმის“ მთავარმა მწვრთნელმა, იურგენ ზუმელმა ოთარ კიტეიშვილის ტრავმაზე კომენტარი გააკეთა და აღნიშნა, რომ გუნდს სასწრაფოდ სჭირდება გაძლიერება.

საქართველოს ნაკრების ერთ-ერთი ლიდერი ავსტრიის ბუნდესლიგაში „გრაცერთან“ გასვლით შეხვედრაში პირველ ტაიმში დაშავდა. მან საკუთარი საჯარიმოს მისადგომებიდან რეიდი წამოიწყო და ბურთი მეტოქის საჯარიმომდე მიიტანა, თუმცა შემდეგ მოედანი კოჭლობით დატოვა და შესვენების შემდეგ თამაშის გაგრძელება ვეღარ შეძლო. როგორც გაირკვა, კიტეიშვილმა ბურთისთვის ბრძოლაში წვივი დაიზიანა.

„კიტეიშვილის ტრავმა ძალიან მტკივნეულია, თუმცა საბოლოო დიაგნოზს დაველოდოთ. ფაქტია, რომ ტრავმიანობის კრიტიკული ზღვარი უკვე გადავლახეთ და სასწრაფოდ გვჭირდება ტრანსფერი. წინ ბევრი თამაშია.

ფეხბურთელებმა „გრაცერთან“ და ბოლო მატჩებში შესანიშნავად ითამაშეს და უზარმაზარი ენერგია დახარჯეს. თუმცა დარწმუნებული ვარ, თუ გვინდა, რომ ავსტრიის ბუნდესლიგაში ისევ იმავე დონეზე ვასპარეზოთ, როგორც ბოლო წლებში, აუცილებლად უნდა გავიძლიეროთ“, – განაცხადა „შტურმის“ მთავარმა მწვრთნელმა.