ცნობილი ხდება, რა პოზიცია აქვს ჟოზე მოურინიოს ზურიკო დავითაშვილის ტრანსფერთან დაკავშირებით

იმის შანსი, რომ ზურიკო დავითაშვილმა ზამთრის სატრანსფერო პერიოდში სენტ ეტიენი დატოვოს, იზრდება. როგორც ირკვევა, 24 წლის ქართველი ფეხბურთელით კიდევ რამდენიმე ევროპული კლუბი დაინტერესდა და ახლა, ყველაფერი იმაზეა დამოკიდებული, რამდენად წარმატებულად წარიმართება მოლაპარაკებები.

Canto das Transferências-ის ექსკლუზიური ინფორმაციის თანახმად, დავითაშვილის საკუთარ რიგებში ხილვა ლისაბონის ბენფიკას სურს, რომელსაც ლეგენდარული ჟოზე მოურინიო ავარჯიშებს. არსებული ინფორმაციით, სენტ ეტიენი ზურიკოს სანაცვლოდ 25 მილიონ ევროს ითხოვს ანაც თანახმაა, რომ ქართველი ნახევარმცველი იჯარის წესით გაუშვას შემდგომი გამოსყიდვის უფლებით.

ამასთან, როგორც თურქი ჟურნალისტი ეკრემ კონური წერს, დავითაშვილს ყურადღებით აკვირდებიან პრემიერლიგის ბინადარი ევერტონი და თურქული სუპერლიგის წევრი ფენერბაჰჩე. კიდევ ერთი თურქული გრანდის ბეშიქთაშის ინტერესის შესახებ აქამდეც იყო ცნობილი.