100 მილიონი უნდა გაამზადონ - პსჟ-ს ზაფხულში მთავარი ტრანსფერი დაგეგმილი აქვს

„ბორნმუთის“ ახალგაზრდა თავდამსხმელმა, ელი ჟუნიორ კრუპიმ, რომელიც კლუბს საფრანგეთის ლიგა 2-ის „ლორიანიდან“ შეუერთდა, პრემიერლიგაში ბრწყინვალე სეზონი ჩაატარა. 19 წლის ფორვარდი ისტორიაში პირველი 20 წლამდე ფეხბურთელი გახდა, რომელმაც ინგლისის ჩემპიონატის სადებიუტო წელს 13 ბურთის გატანა შეძლო.

Footmercato-ს ინფორმაციით, კრუპის მიმართ სერიოზულ ინტერესს იჩენს პსჟ, თავად მოთამაშის ოცნებაც სწორედ პარიზულ გრანდში გადასვლაა. მიუხედავად იმისა, რომ Transfermarkt ფეხბურთელს 70 მილიონ ევროდ აფასებს, „ბორნმუთი“ მის გაშვებას 100 მილიონ ევროზე ნაკლებად არ აპირებს, რადგან ფორვარდს ინგლისურ კლუბთან მოქმედი კონტრაქტი 2030 წლის ზაფხულამდე აკავშირებს.

პარიზელების გარდა, საფრანგეთის ახალგაზრდული ნაკრების წევრის (5 მატჩი, 3 გოლი) დამატება ევროპის სხვა წამყვან კლუბებსაც სურთ. 19 წლის ტალანტის ტრანსფერით დაინტერესებულთა შორის „არსენალი“, „ჩელსი“, „მანჩესტერ სიტი“, „ბარსელონა“ და მიუნხენის „ბაიერნი“ სახელდებიან.