რატომ კვარას ოქროს ბურთი და არა ვინმე ფრანგს - ცნობილმა ჟურნალისტმა პლატინის შეუტია

ნაწილი ფრანგებისა კვარაცხელიასთვის "ოქროს ბურთის" მიცემას ეწინააღმდეგება

გამოჩენილი ფრანგი ვეტერანი ფეხბურთელის, მიშელ პლატინის განცხადებამ, რომელმაც „ოქროს ბურთის“ მოგების უმთავრეს პრეტენდენტად პსჟ-ის შემტევი ხვიჩა კვარაცხელია მიიჩნია, ფრანგი ჟურნალისტის, პიერ მენესის უკმაყოფილება გამოიწვია.

მენესმა პლატინი საკუთარ „იუთუბ“ გადაცემაში გააკრიტიკა და აღნიშნა: „როცა პლატინის დაუსვეს კითხვა, თუ ვის მიიჩნევს „ოქროს ბურთის“ ფავორიტად, მან კვარაცხელია აირჩია, არადა შეეძლო საკუთარი თანამემამულეებისთვის დაეჭირა მხარი. ჯილდოს მოპოვების რეალური შესაძლებლობა რამდენიმე ფრანგსაც აქვს, მათ შორის უსმან დემბელეს, კილიან მბაპესა და მაიკლ ოლისეს“.

ცნობისთვის, გერმანულ გამოცემა „ბილდთან“ საუბრისას, საქართველოს ეროვნული ნაკრების მთავარმა მწვრთნელმა ვილი სანიოლმა განაცხადა, რომ მისი აზრით, „ოქროს ბურთის“ მიღებას მაიკლ ოლისე იმსახურებს.