პსჟ-მ ვერაფერში გვაჯობა. სამწუხაროდ, მათ მაშინ შევხვდით, როცა... - სალაჰი

„ლივერპულის“ ლიდერმა მოჰამედ სალაჰმა ჩემპიონთა ლიგის მერვედფინალში „პარი სენ-ჟერმენთან“ გამართული ორმატჩიანი დაპირისპირება გაიხსენა.

ეგვიპტელი შემტევის თქმით, პირველი შეხვედრა მეტწილად მერსისაიდელთა იღბალს უკავშირდებოდა, თუმცა განმეორებით მატჩში „ლივერპული“ უპირატესად გამოიყურებოდა.

„პარიზში აშკარად გაგვიმართლა. ალისონმა საოცრად ითამაშა – შეიძლება ითქვას, ეს მის კარიერაში ერთ-ერთი საუკეთესო მატჩი იყო. რამდენიმე ეპიზოდში მან ჩვენ გოლისგან გადაგვარჩინა.

რაც შეეხება „ენფილდზე“ გამართულ მატჩს – ვერცერთ კომპონენტში ვერ გვაჯობეს. ეს იყო საკმაოდ დაბალანსებული შეხვედრა, სადაც მომენტები ორივე გუნდს ჰქონდა. სამწუხაროდ, სეზონში ერთი თვე ჩავარდნა გვქონდა და სწორედ ამ პერიოდში გვიწია პსჟ-ს წინააღმდეგ თამაში“, – განაცხადა სალაჰმა.

შეგახსენებთ, რომ ეგვიპტელმა თავდამსხმელმა მიმდინარე სეზონში 49 მატჩში 33 გოლი გაიტანა და 23 საგოლე გადაცემა შეასრულა.