ჩემპიონთა ლიგის ფინალამდე 4 დღით ადრე კვარას მდგომარეობის შესახებ ინფორმაცია გავრცელდა

ფრანგული მედიის ინფორმაციით, „პსჟ“-ს გარემარბმა ხვიჩა კვარაცხელიამ, რომელმაც ჯანმრთელობის მცირე პრობლემის გამო საფრანგეთის თასის ფინალი „რეიმსის“ წინააღმდეგ გამოტოვა, დღევანდელ ვარჯიშში მონაწილეობა სრული დატვირთვით მიიღო.

პსჟ-ს მთავარმა მწვრთნელმა ლუის ენრიკემ ფინალის შემდეგ აღნიშნა, რომ ქართველი ფეხბურთელის მდგომარეობა საგანგაშო არ იყო და ის სამშაბათს გუნდთან ერთად ივარჯიშებდა. სწორედ ასე მოხდა.

როგორც Geo Team იტყობინება, კვარაცხელია თავს კარგად გრძნობს, ვარჯიშში აქტიურად ჩაერთო და მიუნხენში, „ინტერის“ წინააღმდეგ გასამართ ჩემპიონთა ლიგის ფინალს სრულიად მზად შეხვდება.

ქართველი ვარსკვლავისთვის ეს კარიერის ყველაზე მნიშვნელოვანი მატჩია და მის მზადყოფნას გუნდისთვის გადამწყვეტი მნიშვნელობა ექნება. ფინალამდე კი მხოლოდ ოთხი დღე რჩება.