"ეს არის მიზეზი, რატომაც კვარასთან და ოსიმენთან მუშაობის შესაძლებლობა მაბედნიერებს" - რუდი გარსია

"ნაპოლის" ახალმა მთავარმა მწვრთნელმა, რუდი გარსიამ, წინასასეზონო შეკრების დაწყებასთან დაკავშირებით, პრესკონფერენცია გამართა.

ფრანგმა სპეციალისტმა გუნდის სატრანსფერო გეგმებისა და "პარტენოპეის" ვარსკვლავურ ტანდემს, ხვიჩა კვარაცხელიასა და ვიქტორ ოსიმენის შესახებ ისაუბრა.

"პრეზიდენტის ამბიციები მომწონს. ჩვენ ისეთივე ძლიერი გუნდი გვეყოლება, როგორც შარშან გვყავდა. მიზანი შემადგენლობის ყველა სხვა წევრის შენარჩუნებაა, რადგან კიმმა დაგვტოვა. იქიდან გამომდინარე, რომ ახალგაზრდების გამოცდა მსურს, შეკრებაზე ბევრი ახალგაზრდა მოვიწვიე. იმედი მაქვს, ერთს მაინც ვიპოვი ისეთს, ვისაც გუნდში დარჩენა შეეძლება. 

ოსიმენს ვესაუბრე. გარწმუნებთ, რომ ჩვენთან ბედნიერად გრძნობს თავს, დარჩენა და დიდი მიზნების შესასრულებლად ბრძოლა უნდა.

ცხადია, ოსიმენთან და კვარასთან მუშაობის პერსპექტივა მახარებს. ინდივიდებს გოლები და საგოლე პასები გამოარჩევთ, მაგრამ ამის გაკეთება იმიტომ შეუძლიათ, რომ ბურთი მისდით. მთავარია გუნდი და არა ინდივიდუალისტები. ვიმედოვნებ, ისინი გააგრძელებენ მოედანზე განსხვავების შექმნას, თუმცა მე ყურადღებას მთელ ჯგუფს ვაქცევ. 

მხოლოდ კვარა და ოსიმენი არ არიან მნიშვნელოვნები - ჩემს გეგმებში რასპადორიც შედის, სიმეონეც, ელმასიც, და პოლიტანოც," - თქვა გარსიამ.

შეგახსენებთ, რომ "ნაპოლის" პრესეზონი უკვე დაიწყო. ხვიჩა და სხვა ფეხბურთელები, რომლებმაც ივნისის სანაკრებო მატჩებში მიიღეს მონაწილეობა, გუნდს მომდევნო კვირაში შეუერთდებიან.