ისევ ტრავმა - შემაშფოთებელი ცნობები "ნაპოლიდან"

ხვიჩა კვარაცხელია "ნაპოლისთან" ერთად ვარჯიშს დაუბრუნდა, თუმცა "პარტენოპეის' დღევანდელი სავარჯიშო სესია მაინც გამოირჩა საკმაოდ უსიამოვნო ამბით.

საქმე ვიქტორ ოსიმენს ეხება. 25 წლის ცენტრფორვარდმა მარჯვენა ფეხზე კოჭ-წვივის ტრავმა მიიღო. საინტერესოა, რომ ნიგერიელმა შემტევს აღნიშნული დაზიანება გუნდის ბრაზილიელმა ახალწვეულმა ნატანმა მიაყენა.

ყინულის სახვევის დადების შემდეგ ვიქტორმა მინდორი კოჭლობით დატოვა. ვითარებას ამძიმებს ისიც, რომ ვარჯიში მან სულ რაღაც გუშინ განაახლა.

იტალიურ მედიას თუ დავუჯერებთ, მსგავსი დაზიანების სრულად მკურნალობას 2-3 კვირა სჭირდება.

მარცხენა ფეხზე ტრავმა ამირ რაჰმანმაც მიიღო.

ნეაპოლელთა რიგებში ტრავმიანობის მომრავლება ნამდვილად შემაშფოთებელია, რადგან გუნდს ახალი სეზონი მოადგა კარს. სერია ა-ს ახალ გათამაშებას მოქმედი ჩემპიონები 19 აგვისტოს, "ფროზინონესთან" მატჩით დაიწყებენ.