პარი სენ-ჟერმენის ლეგენდა: "მათ მილიონებს არ უნდა უხდიდნენ"

პარი სენ-ჟერმენის ლეგენდად წოდებულმა, ხავიერ პასტორემ ერთ-ერთ გამოცემასთან ინტერვიუ ჩაწერა.

მან თანამედროვე ფეხბურთში არსებულ სიტუაციაზე ისაუბრა და განაცხადა, რომ ახალგაზრდა მოთამაშეებს დიდ ფულს არ უნდა უხდიდნენ.

"რთულია იმის თქმა, რა უნდა შეიცვალოს თანამედროვე ფეხბურთში. ჩვენ, ყოფილი ფეხბურთელები მუდმივად ვავლებთ პარალელებს წარსულთან და ვამბობთ, რომ ჩვენ დროს ესა თუ ის პრობლემა სხვანაირად გვარდებოდა. ეს არასწორი მიდგომაა - სამყარო იცვლება ამ ცვლილებებს ფეხი უნდა აუწყო.

თუმცა გამოვყოფ ერთ რამეს, რაც თანამედროვე სპორტში ძალიან არ მომწონს: ახალგაზრდა ფეხბურთელებს ძალიან დიდი ხელფასები აქვთ. როდესაც ახალგაზრდა ასაკში დიდი ფული გაქვს, კარგავ სიყვარულს სპორტის მიმართ. თუ 18-19 წლის ბიჭს წელიწადში 10 მილიონი ევრო აქვს, როგორ დააყენებს ის პირველ პლანზე ფეხბურთისადმი სიყვარულს?

ასეთ დროს მნიშვნელოვანია, მჭიდრო კავშირი შეინარჩუნო ახლობელ ადამიანებთან. შენს ცხოვრებაში გამოჩნდება ხალხი, რომელიც ისაუბრებს ინვესტიციებზე და ბიზნეს იდეებზე, ფეხბურთი კი საერთოდ აღარ გახსენდება“, - განაცხადა ყოფილმა არგენტინელმა ფეხბურთელმა.