ბრალი ადამიანით ვაჭრობაზე! პსჟ-ს ფეხბურთელი სკანდალშია

"პარის სენ-ჟერმენის" ფეხბურთელი, ლუკას ერნანდესი და მისი მეუღლე ადამიანით ვაჭრობასა და უკანონო საქმიანობის ორგანიზებაში არიან დადანაშაულებულნი. 

კერძოდ, პსჟ-ს მცველს კოლუმბიური ოჯახი უჩივის. აღნიშნული ოჯახის წევრები ერნანდესთან მუშაობდნენ. 

კოლუმბიელებმა განაცხადეს, რომ წყვილი მათ 2024 წლის სექტემბრიდან 2025 წლის ნოემბრამდე ამუშავებდა სამართლებრივი ჩარჩოს გარეშე და სამუშაო საათები დადგენილ ნორმებს მნიშვნელოვნად სცდებოდა. 

საჩივარში ასევე წერია, რომ ოჯახის თითოეული წევრი კვირაში 72-დან 84 საათამდე დასაქმების ოფიციალური კონტრაქტის გარეშე მუშაობდა. 

ცნობილი ხდება, რომ ოჯახმა ვერსალის პროკურატურაში საჩივარი უკვე შეიტანა და გამოძება ინტენსიურად მიმდინარეობს. 

აქვე გეტყვით, რომ აღნიშნული ოჯახი შეადგენს ცოლ-ქმარსა და 3 შვილს. ისინი სხვადასხვა პოზიციებს იკავებდნენ, მათ შორის დაცვის სამსახური, დამლაგებელი, მზარეული და ძიძა.