„დრო და მოთმინება სჭირდება“ — ხავი გრასია გიორგი ჩაკვეტაძის მდგომარეობაზე საუბრობს

,,უოტფორდის" მთავარი მწვრთნელი ხავი გრასია ქართველ ფეხბურთელ გიორგი ჩაკვეტაძის მზადყოფნაზე საუბრობს და ამბობს, რომ მიუხედავად აშკარა პროგრესისა, მისი დაბრუნება მაინც ეტაპობრივად უნდა მოხდეს.

ინგლისის ჩემპიონშიპის მე-16 ტურში ,,უოტფორდი'' 22 ნოემბერს დერბი ქაუნთის სტუმრობს.

ჩაკვეტაძემ ცოტა ხნის წინ გუნდთან ერთად სრული დატვირთვით ვარჯიში განაახლა, თუმცა მწვრთნელი ამ შეხვედრაში მის მონაწილეობას გამორიცხავს.

გარსიას თქმით, ჩაკვეტაძე საკმაოდ დიდხანს იყო ტრავმირებული და ახლა მნიშვნელოვანია, რომ აღდგენის პროცესში არ იჩქარონ.

„გიორგი წინ მიიწევს, მაგრამ მას დრო სჭირდება. გუნდთან სრულფასოვნად ჩასართავად მოთმინებაა აუცილებელი, ჩვენ ძალიან გვინდა, რომ ის მალე დაგვიბრუნდეს, მაგრამ ახლა მთავარი მისი მხარდაჭერა და სწორი ტემპით დაბრუნებაა,“ – აღნიშნა გრასიამ.

26 წლის ქართველს უკვე თითქმის რვა თვეა ოფიციალურ მატჩს არ ჩატარებია. ამის მიუხედავად, გასულ სეზონში მას კარიერის ყველაზე დატვირთული პერიოდი ჰქონდა – უოტფორდში 39 მატჩი, თასზე ერთი და საქართველოს ნაკრებში 8 შეხვედრა, სადაც მას ჯამში 4 შედეგიანი ქმედება ჰქონდა.

ამჟამად ,,უოტფორდს" 20 ქულა აქვს და მე-15 პოზიციაზე იმყოფება, დერბი ქაუნთი კი 23 ქულით ათეულშია.

 პლეი ოფის ზონამდე ,,უოტფორდს" მხოლოდ ხუთი ქულა აკლია, რაც გუნდისთვის რეალური მიზანი რჩება.