"გუნდისთვის კვარა საკვანძო ფიგურაა და მისი არ ყოფნა..." - რა თქვა პსჟ-ს ყოფილმა ფეხბურთელმა

როგორც მოგეხსენებათ, ჩემპიონთა ლიგის ბოლო ტურში პარი სენ-ჟერმენისა და ნიუკასლის მატჩი ფრედ, 1:1 დასრულდა.

აღნიშნულ შეხვედრაში, ხვიჩა კვარაცხელიამ ანტონი ელანგასთან შეჯახების დროს კოჭის არეში დაზიანება მიიღო.

ქართველმა თამაშის გაგრძელება ვეღარ შეძლო და მინდორი კოჭლობით დატოვა.

დადასტურდა, რომ კვარას ტრავმიდან 2 კვირაში დაბრუნდება.

არსებულ სიტუაციას პსჟ-ს ყოფილი ფეხბურთელი, ფაბრის პანკრატი ეხმაურება:

"ის გუნდის საკვანძო ფიგურაა. ზუსტი დიაგნოზისთვის ლოდინია საჭირო, თუმცა განმეორებით კადრებში ჩანს, რომ კოჭი საკმაოდ უხერხულად გადაუბრუნდა. მირჩევნია ოპტიმისტად დავრჩე - თუ საქმე მხოლოდ ერთ ან ორ კვირას ეხება, ეს პრობლემა არაა, მაგრამ ერთი თვით ან მეტით ჩამოშორება უკვე მტკივნეული იქნება.

კვარაცხელიას აქვს ატიპური, ტექნიკური თამაშის სტილი, რომელსაც გარდატეხის შეტანა შეუძლია. დეზირე დუე რაღაცით ჰგავს მას, თუმცა ხვიჩას უფრო დიდი ხედვა აქვს, ვიდრე სხვებს. მას აქვს ნიჭი, აიყოლიოს თანაგუნდელები და მუდმივი მოძრაობით დააბნიოს მეტოქის დაცვა, რაც სივრცეებს განაპირა მცველებსაც უთავისუფლებს. მისი არყოფნა პარიზელთა შეტევას შეაფერხებს, თუმცა გუნდს სხვა იარაღებიც მოეპოვება".