ლივერპულს, შეიძლება, მამარდა ხელიდან გამოსტაცონ - მოულოდნელმა ინფორმაციამ მედია ააფეთქა

Mirror-ის ინფორმაციით, შესაძლოა, ლივერპულს ხელიდან გამოსტაცოს ვალენსიას ქართველი გოლკიპერი გიორგი მამარდაშვილი, თუმცა ყველაფერი ჯეიდონ სანჩოს მომავალზეა დამოკიდებული. გამოცემის მტკიცებით, იუნაიტედსაც სურს ევრო 2024-ის ერთ-ერთი საუკეთესო მეკარე.

"ყველაფერი დამოკიდებულია იმაზე, როგორ განვითარდება ჯეიდონ სანჩოს უახლოესი მომავალი. შეძლებს თუ არა იუნაიტედი ბოლო მომენტში "ხელიდან გამოსტაცოს" ლივერპულს გიორგი მამარდაშვილი. იუნაიტედს უკვე დიდი ხანია, სურს ქართველი გოლკიპერი, მაგრამ ტრანსფერისთვის საჭიროა ფეხბურთელების გაყიდვა. 24 წლის სანჩოს გაყიდვა იუნაიტედს დიდ შანსს მისცემს სატრანსფერო მანევრისთვის",  - წერს "მირორი". 

მედია წერს, რომ ვალენსია გიორგის სანაცვლოდ 40 მილიონ ევროს ითხოვს, ამდენის გადახდა კი ლივერპულს არ სურს, თორემ ქართველ მეკარესთან პირად კონტრაქტზე უკვე მოლაპარაკებულია. სწორედ ამით შესაძლოა, ისარგებლოს მანჩესტერ იუნაიტედმა.

დღეს ვალენსიამ ლა ლიგის პირველ ტურში 1:2 წააგო ბარსელონასთან, მამარდაშვილის 6 "სეივის" მიუხედავად - დუბლი რობერტ ლევანდოვსკიმ შეასრულა (გამარჯვების გოლი პენალტით გაიტანა). "მესტალია" ქართველს ასეთი შეძახილებით შეხვდა - Giorgi, quédate (გიორგი დარჩი).