ინგლისის ნაკრების ყოფილი მეკარე - ამ მიზეზის გამო შანსი არ არის, მამარდაშვილი ლივერპულში პირველი მეკარე გახდეს

ინგლისის ნაკრების ყოფილმა მეკარემ, პოლ რობინსონმა Football Insider-ის ეთერში გიორგი მამარდაშვილის შესახებ ისაუბრა და განაცხადა, რომ ქართველი მეკარე „ლივერპულში“ სადებიუტო სეზონში პირველი მეკარე ვერ იქნება. 

რას ამბობს რობინსონი: „არ არსებობს შანსი, რომ მამარდაშვილმა გუნდში პირველი ადგილი დაიკავოს. ის მეორე ნომერი იქნება, კელეჰერი კი წავა. უკვე დროა, რომ კელეჰერი და მისი კარიერა უფრო წინ წავიდეს და სხვა გუნდში პირველი ნომერი გახდეს. მან დაამტკიცა, რომ ამის გაკეთება უმაღლეს დონეზე შეუძლია. „ლივერპული“ მას აშკარად არ მიიჩნევს ალისონის ბუნებრივ მემკვიდრედ და სწორედ ამიტომ დაიმატა მამარდაშვილი.

ქართველმა მეკარემ სეზონის მეორე ნახევარი მაღალ დონეზე ჩაატარა, მაგრამ „ლივერპულში“ გადასვლის შემდეგ ის კელეჰერის ადგილს დაიკავებს და ალისონის შემცვლელი იქნება“. 

შეგახსენებთ, რომ გიორგი მამარდაშვილი „ლივერპულის“ საკუთრება გასული ზაფხულის სატრანსფერო ფანჯრის დროს გახდა და 1 სეზონით კვლავ „ვალენსიაში“, იჯარის წესით დარჩა. ქართველი მეკარე მერსისაიდულ გუნდს სეზონის დასრულების შემდეგ, ივლისში შეუერთდება.