CIES-ის რეიტინგი: ხვიჩა კვარაცხელია საუკეთესო შემტევებს შორის

CIES საფეხბურთო ობსერვატორიამ ბოლო ექვს თვეში ჩატარებული ეროვნული ჩემპიონატების მატჩების საფუძველზე შეტევის დაგვირგვინების ყველაზე ძლიერი ფეხბურთელების რეიტინგი გამოაქვეყნა. 

აქ შეფასებულია დარტყმების რაოდენობა და ეფექტურობა.

პირველ ადგილზე „რეალის“ ფრანგი ფორვარდი კილიან მბაპე მოხვდა, რომელმაც მაქსიმალური 100 ქულა მიიღო, მას მოსდევენ „ბაიერნის“ ინგლისელი თავდამსხმელი ჰარი კეინი (96,6) და „ინტერ მაიამის“ არგენტინელი ლიდერი ლიონელ მესი (92,5).

პირველი ათეულის სხვა წევრები არიან: 

სერუ გირასი (დორტმუნდი) – 92,3, ლუის დიასი (ბაიერნი) – 92,3, ხულიან ალვარესი (ატლეტიკო) – 91,4, ვანგელის პავლიდისი (ბენფიკა) – 91,3, ვიქტორ გიოკერეში (არსენალი) – 90,9, ნიკოლას ლოპესი (ნასიონალი) – 90,8 და ფერან ტორესი (ბარსელონა) – 90,5.

აღსანიშნავია, რომ რეიტინგში მოხვდა „პარი სენ-ჟერმენის“ ქართველი შემტევიც, ხვიჩა კვარაცხელია. ქართველი ფეხბურთელი 24-ე პოზიციას იკავებს 87,7 ქულით.