"მომავლის რობერტო კარლოსი!" - გავლენიანი გამოცემა საბა ხარებაშვილზე წერს

დიდმა საფეხბურთო გამოცემამ, FourFourTwo-მ 17 წლის ქართველ ამომავალ ვარსკვლავს, საბა ხარებაშვილს ვრცელი სტატია მიუძღვნა.

"ქართული ფეხბურთი, ალბათ, არასდროს ყოფილა ასეთი კარგი. ევროპაში ხვიჩა კვარაცხელიას გამოჩენის შემდეგ და მისი წინამძღოლობით, ბოლო ორი წლის განმავლობაში ისეთმა მოთამაშეებმა, როგორებიც გიორგი მამარდაშვილი და გიორგი მიქაუტაძე არიან, დიდი ნაბიჯები გადადგეს. თუმცა ამ თაობაში შესაძლოა სწორედ საბა ხარებაშვილი იყოს ქვეყნის ყველაზე ამაღელვებელი ტალანტი.

საბა ხარებაშვილი იმავე აკადემიის აღზრდილია, რომელმაც ხვიჩა კვარაცხელია გაზარდა. პოზიციით მარცხენა მცველს, საბა ხარებაშვილს, „კვარადონას“ მსგავსად, „რობერტო ხარელოსი“ შეარქვეს. 15 წლის ასაკში მას უკვე ჰქონდა ნათამაშები უეფას ტურნირზე და კონტინენტზე ერთ-ერთ ყველაზე მოთხოვნად თინეიჯერად ითვლება. ის თბილისის „დინამოს“ ძირითადი შემადგენლობის შეუცვლელი წევრია. მას უკვე ჰქონდა დებიუტი საქართველოს ნაკრებში და „ჯვაროსნების“ ისტორიაში ყველაზე ახალგაზრდა დებიუტანტი გახდა.

2008 წელს დაბადებულ მცველს ერთგვარი „უნიკორნის“ პროფილი აქვს: ბრწყინვალე ფლეიმეიქერი ჯადოსნური ჯოხის მსგავსი მარცხენა ფეხით, რომელიც box-to-box-ის ძრავითა და ძლიერი ცენტრალური მცველის აღნაგობით გამოირჩევა. როგორც ამბობენ, თავად ხარებაშვილი მადრიდის „რეალის“ გულშემატკივარია და მისი კუმირი კრიშტიანუ რონალდუ იყო.

დისციპლინა: მიუხედავად იმისა, რომ ჩაჭრების მხრივ ბრწყინვალე მაჩვენებლები აქვს, ხარებაშვილი ვარდნებისას ხანდახან მოუთმენლობას იჩენს. კონცენტრაციის პერიოდული დაკარგვის გამო შეიძლება ითქვას, რომ ის გუნდისთვის უფრო სასარგებლო მაშინ არის, როცა ბურთს ფლობს, ვიდრე მაშინ, როცა მის გარეშეა. ბუნებრივია, ის დროთა განმავლობაში განვითარდება — განსაკუთრებით მაშინ, როცა უფრო მაღალ დონეზე გადავა. თუმცა ნუ გაგიკვირდებათ, თუ ზოგჯერ მეტოქე გაეპარება, პოზიციას დაკარგავს ან არასაჭირო ჯარიმას აიღებს.

საჰაერო დუელები: სიმაღლის მიუხედავად, ხარებაშვილი თავით თამაშისას სათანადო აგრესიით არ გამოირჩევა. როდესაც საქმე საჰაერო დუელებს ეხება, მას შეუძლია ე.წ. „შავ მაგიასაც“ მიმართოს.

ორივე ფეხით თამაში: ხარებაშვილის მარცხენა ფეხი იმდენად კარგია, რომ მარჯვენას ხშირად არ იყენებს. მარცხენა მცველისთვის ეს დიდი პრობლემა არ არის, თუმცა თუ დროთა განმავლობაში ის ნახევარდაცვაში გადაინაცვლებს ან ცენტრალური მცველი გახდება, მოუწევს, რომ მარჯვენა ფეხით თამაშიც ოდნავ მეტად დახვეწოს".

აქვე შეგახსენებთ, რომ ხარებაშვილმა თურქულ ბაშაქშექირთან გააფორმა კონტრაქტი. ის გუნდს 2026 წლის სექტემბერში შეუერთდება.