სუპერკომპიუტერმა აზრი შეიცვალა - რომელ ეტაპზე დაასრულებს საქართველოს ნაკრები ევრო 2024-ს

ივნისამდე სულ უფრო ცოტა რჩება,  ქართველი გულშემატკივრისთვის კი დრო ისედაც ჩვეულებრივზე სწრაფად გადის, რადგან სადებიუტო ევროპის ჩემპიონატზე განუწყვეტლივი ფიქრი ჟამთა სვლას შესამჩნევად აჩქარებს.

ბუნებრივია, ყველას გვაინტერესებს, თუ როგორ გამოვა საქართველოს ნაკრები F ჯგუფში და მოიპოვებს თუ არა ფლეი ოფის საგზურს, თუმცა გვაქვს სხვა ინტრიგებიც: ვინ იქნება "ჯვაროსანთა" საუკეთესო ფეხბურთელი ტურნირზე, ვინ გაიტანს პირველ ქართულ გოლს დიდ საფეხბურთო ფორუმზე, ვინ დაამთავრებს ტურნირს ნაკრების ბომბარდირის სტატუსით.

ამ შეკითხვებზე პასუხის გაცემას ცნობილი სტატისტიკური სააგენტოს სუპერკომპიუტერიც ეცადა. მისი ყველაზე საინტერესო ვერდიქტი ვილი სანიოლის კოლექტივის მიერ ტურნირზე დაფიქსირებულ შედეგს ეხება.

ალგორითმი გვარწმუნებს, რომ საქართველო ისტორიულ ფორუმზე ასპარეზობას მეოთხედფინალურ სტადიაზე დაასრულებს. მაშასადამე, ქართველები ჯგუფურ ეტაპსა და მერვედფინალს გადალახავენ. ის, თუ ვინ იქნება მერვედფინალში "ჯვაროსანთა" მეტოქე, მათ მიერ ქვეჯგუფში დაფიქსირებულ შედეგზეა დამოკიდებული: თუ ქართველები მერვედფინალში სწორედ მესამე ადგილით გააღწევენ, მათი მეტოქე B ან C ჯგუფის გამარჯვებული იქნება. B ჯგუფში პირველობისთვის წესით ესპანეთმა და იტალიამ უნდა იბრძოლონ, C ჯგუფში კი გამოკვეთილი ფავორიტი ინგლისის ნაკრებია. F ჯგუფის მეორეადგილოსანი D ჯგუფის გამარჯვებულს ხვდება (ფავორიტებად აქ საფრანგეთი და ნიდერლანდები განიხილებიან), ხოლო თუ საქართველოს ნაკრებმა ტურნირის მთავარი სენსაცია მოახდინა და თავისი ჯგუფი მოიგო, A, B და C ჯგუფებიდან რომელიმეს მესამეადგილოსანს შეხვდება.

ცხადია, ეს ყოველივე განსაზღვრავს მეოთხედფინალის მეტოქესაც.

სხვათა შორის, სუპერკომპიუტერის წინა პროგნოზი საქართველოს ნაკრებს მერვედფინალში დამარცხებას უქადდა. ძნელი სათქმელია, რა გარემოებებმა შეცვალა ზემოთთქმული, თუმცა ამას ჩვენ მხოლოდ მივესალმებით.

აქვე შეგახსენებთ, რომ ევრო 2024 სტარტს 14 ივნისს აიღებს, "ჯვაროსნებს" კი პირველი მატჩი 18 ივნისს, თურქეთის ეროვნული გუნდის წინააღმდეგ ელოდებათ.