რა შემთხვევაში მოიპოვებს საქართველოს ნაკრები პარიზის ოლიმპიადის საგზურს

როგორც მოგეხსენებათ, საქართველოს 21-წლამდელთა ნაკრებმა ბელგიის წინააღმდეგ 2:2 ითამაშა და ორი მატჩის შემედგ 4 ქულა დააგროვა.

ამ მომენტისთვის "ჯვაროსნები" ჯგუფის ერთპიროვნული ლიდერები არიან და პლეიოფში გასვლის რეალური შანსი გააჩნიათ.

აღსანიშნავია, რომ ჩვენს ნაკრებს ამ ჩემპიონატზე წარმატებით პარიზის 2024 წლის ოლიმპიადის საგზურის მოპოვება შეუძლია.

კერძოდ, ამ ტურნირზე სამი საუკეთესო გუნდი ოლიმპიადის საგზურს მიიღებს.

ამასთანავე, არსებობს კიდევ ერთი გზა. რა თქმა უნდა, საფრანგეთის ნაკრებს (როგორც მასპინძელს) ოლიმპიადის საგზური განაღდებული აქვს და თუ ფრანგები ნახევარფინალში გავლენ, ავტომატურად სამი სხვა ნახევარფინალისტი ოლიმპიადაზე მიდის.

აქვე უნდა გავითვალისწინოთ ის მომენტიც, რომ ინგლისის ნაკრებს ოლიმპიადაზე თამაშის უფლება არ აქვს, ვინაიდან ტურნირზე მთლიანად დიდი ბრიტანეთი იასპარეზებს. მაშასადამე, თუ ნახევარფინალში საფრანგეთის გარდა გავა ინგლისიც, მაშინ ოლიმპიადაზე ორი სხვა ნახევარფინალისტის გარდა მიდის მე-5 ადგილოსანიც.

აქვე გეტყვით იმასაც, რომ თუ არც საფრანგეთი და არც ინგლისი არ გავა ნახევარფინალში, მაშინ დაინიშნება მე-3 ადგილისთვის მატჩი, რომელიც გაარკვევს მესამე საგზურის მფლობელის ვინაობას.