• 29-07-2022
    ევროტურნირების შედეგი - რამდენი პოზიცია მოიგო საქართველომ უეფას რეიტინგში
    ევროტურნირების შედეგი - რამდენი პოზიცია მოიგო საქართველომ უეფას რეიტინგში
    Aa

    ევროტურნირების შესარჩევ ეტაპზე ქართულმა კლუბებმა ერთი სრული თვეც ვერ გაძლეს - "დინამო ბათუმი" და "საბურთალო" ასპარეზობას კონფერენს ლიგის მეორე ეტაპიდან გამოეთიშნენ, "დილა" და "დინამო თბილისმა" კი ტურნირი პირველივე სტადიაზე დატოვეს.


    მიუხედავად ამ კატასტროფული შედეგებისა, საქართველომ უეფას საკლუბო რეიტინგში წინსვლა განიცადა.


    2022/2023 წლების სეზონში ქართულმა გუნდებმა ევროტურნირებზე 12 მატჩი ჩაატარეს. აქედან მათ 3 მოიგეს (2 "საბურთალო" და 1 "დინამო თბილისი"), 4 ფრედ დაასრულეს (3 "დინამო ბათუმი" და 1 "დილა") და 6 წააგეს. 


    ქულების სისტემაში ძალიან მარტივია: გამარჯვებაზე ქვეყანა 0.250 ქულას იღებს, ფრეზე - 0.125-ს, ხოლო, ბუნებრივია, მარცხს ქულა არ მოაქვს. ამ დათვლით, ქართულმა კლუბებმა საერთო ყულაბას წელს 1.125 ქულა შესძინეს, რაც წინა 4 სეზონის მაჩვენებელს ჩამორჩება.


    აქამდე მოცემული ინფორმაცია საერთოდ არ იძლევა იმის ფიქრის საშუალებას, რომ საქართველო რომელიმე რეიტინგში უნდა დაწინაურებულიყო, თუმცა ჩვენ 5 წლის წინ ნაჭამი სირცხვილი "დაგვეხმარა". უეფას რეიტინგი ბოლო 5 წელში ნაჩვენები შედეგებით დგება, ამიტომ წელს საქართველოს 2017/2018 წლების სეზონში მოხვეჭილი 0.125 ქულა დააკლდა. ეს სეზონი დამოუკიდებელი ქართული საკლუბო ფეხბურთისთვის ყველაზე კატასტროფული იყო, რამეთუ პირველი ეტაპის გადალახვა ვერცერთმა გუნდმა შეძლო. ჯამში ჩატარებული 8 მატჩიდან იბერიელებმა 1 ფრე ითამაშეს, 7-ში კი დამარცხდნენ.


    ასე და ამგვარად, 0.125 ქულის გამოკლებისა და 1.125 ქულის მომატების შემდეგ საქართველომ უეფას საკლუბო რეიტინგში 47-დან 44-ე პოზიციაზე აინაცვლა.


    ყველაზე საინტერესო კი ის გახლავთ, რომ რეიტინგში საქართველო 11 ქვეყანას უსწრებს და ამ 11-დან 5-ს ევროტურნირების წლევანდელ სეზონში ჯერ კიდევ შემორჩა წარმომადგენელი: მალტა (3 კლუბი), ჩრდილოეთ მაკედონია (2 კლუბი), ისლანდია (2 კლუბი), ლიხტენშტეინი (1 კლუბი), ესტონეთი (1 კლუბი).

    Facebook კომენტარები