ლუის ენრიკე - ჩვენი საუკეთესო თამაში? ეს მხოლოდ დასაწყისია

ჩემპიონთა ლიგის 1/8 ფინალში პარი სენ-ჟერმენისა და ლივერპულის ორმატჩიანმა დაპირისპირებამ ფეხბურთის ყველა ქომაგი სიამოვნებითა და უამრავი ემოციით აავსო.

პარიზში მინიმალური სხვაობით წაგებული მატჩის შემდეგ ხვიჩა კვარაცხელიას პსჟ "ენფილდზე“ მატჩის შემოსატრიალებლად ჩავიდა და 120 წუთის შემდეგ მისიაც შეასრულა. ინგლისური მატჩის მთავარი გმირი ჯიჯო დონარუმა გახდა – პარიზელთა მეკარემ 11-მეტრიანების სერიაში ორი პენალტი მოიგერია და ზღაპრული საღამოც შედგა!

ლუის ენრიკე: "ძალიან ბედნიერი ვარ, ჩვენ ვაჩვენეთ ჩვენი ნამდვილი სახე უძლიერესი გუნდის წინააღმდეგ. ვამაყობთ, რომ ასეთი ძლიერი გუნდი ვართ. ვაჩვენეთ, რომ ფეხბურთის თამაშით სიამოვნებას ვიღებთ და არ აქვს მნიშვნელობა სტადიონს, ატმოსფეროს... ჩვენი საუკეთესო თამაში? არა, ეს მხოლოდ დასაწყისია. ჩვენი მენტალიტეტია, რომ ვიყოთ უკეთესები. სწორედ მენტალიტეტით, ხასიათით და განსაკუთრებით ჯიჯოს წყალობით შევძელით მატჩის მოგება. ახლა უნდა ვიფიქროთ ამ ემოციებზე და აღდგენაზე“.