პსჟ-ს 4 ფეხბურთელი სეზონის საუკეთესოს წოდებისთვის იბრძოლებს - არის თუ არა მათ შორის კვარა

საფრანგეთის პროფესიონალ ფეხბურთელთა ეროვნული კავშირის (UNFP) პრესსამსახურმა 2024/2025 წლის სეზონის საუკეთესო ფეხბურთელის ნომინაციაზე ხუთი მოთამაშე დაასახელა.

პრესტიჟული ინდივიდუალური ჯილდოსთვის „პარი სენ-ჟერმენის“ ოთხი ფეხბურთელი იბრძოლებს – უსმან დემბელე, დეზირე დუე, აშრაფ ჰაკიმი და ვიტინია. მათთან ერთად ნომინანტებს შორის „ლიონის“ თავდამსხმელი რაიან ჩერკიც დასახელდა.

პრესტიჟული ჯილდოს მფლობელი UNFP-ის 33-ე დაჯილდოების ცერემონიაზე გამოვლინდება, რომელიც 11 მაისს ჩატარდება. შეგახსენებთ, რომ „პარი სენ-ჟერმენმა“ საფრანგეთის ჩემპიონის ტიტული უკვე ოფიციალურად მოიპოვა.

ცნობისთვის, ბოლო ოთხი წლის განმავლობაში პრიზის მფლობელი კილიან მბაპე იყო, რომელიც გასულ ზაფხულს პსჟ-დან მადრიდის „რეალში“ გადავიდა.