ლუის ენრიკე - პარი სენ-ჟერმენს ჩემპიონთა ლიგის ფინალისთვის კონკრეტული გეგმა აქვს

„პარი სენ-ჟერმენი“ ჩემპიონთა ლიგის ფინალისკენ სვლას გააგრძელებს. მთავარი მატჩის წინ, რომელსაც პარიზელები 31 მაისს მიუნხენში „ინტერის“ წინააღმდეგ გამართავენ, ლუის ენრიკეს გუნდს წინ კიდევ სამი შეხვედრა აქვს: ორი ლიგა 1-ში და საფრანგეთის თასის ფინალი. 

მატჩამდე „მონპელიესთან“, რომელიც 10 მაისს გაიმართება, ლუის ენრიკემ მედიის წინაშე გუნდის მომდევნო ნაბიჯებზე ისაუბრა: 

„ჩვენი გეგმა ინდივიდუალურ დატვირთვებზეა აგებული – ვინ რამდენი წუთი გაატარა სეზონის განმავლობაში, ვინ რამდენად არის ფსიქოლოგიურად და ფიზიკურად გადაღლილი. მიზანია, სწორად დავგეგმოთ მოლოდინი, რათა მოთამაშეები ორივე ფინალს სრულ მზადყოფნაში შეხვდნენ. დასვენება გადამწყვეტია, მაგრამ მხოლოდ დღეების მინიჭება არ კმარა – ტრენინგებიც ჭკვიანურად უნდა დავგეგმოთ და სათამაშო დრო გონივრულად გავანაწილოთ. თითოეულს სჭირდება ინდივიდუალური მიდგომა, რადგან სეზონის ამ ეტაპზე წონასწორობის პოვნა ყველაზე რთულია.“

 ესპანელმა სპეციალისტმა საფრანგეთის თასის ფინალზეც გაამახვილა ყურადღება: „სჯობს, ჩემპიონთა ლიგის ფინალის წინ კიდევ ერთი ფინალი გქონდეს. „რეიმსთან“ მატჩი საუკეთესო შესაძლებლობაა, რომ ისეთი სიხშირით ვითამაშოთ, რაც მოახლოებული გადამწყვეტი თამაშებისთვის დაგვჭირდება. ვფიქრობ, კალენდარი იდეალურად ემთხვევა ჩვენს გეგმებს.“ 

ენრიკეს გუნდს ლიგაში „მონპელიესთან“ და „ოსერთან“ მატჩები ელოდება, თასზე კი – დუელი „რეიმსთან“. ეს ყველაფერი კი ჩემპიონთა ლიგის ფინალამდე – 31 მაისამდე უნდა მოხდეს.