ზაფხულში პარი სენ-ჟერმენს ძვირად ღირებული ფეხბურთელი ტოვებს და პრემიერ ლიგაში გადადის

ინგლისური მედიის ცნობით, "პსჟ"-ის პორტუგალიელი თავდამსხმელი გონსალო რამოში შესაძლოა ზაფხულში კლუბიც და ლიგაც შეიცვალოს. გამოცემა CaughtOffside იუწყება, რომ 23 წლის ფეხბურთელით პრემიერ ლიგის ორი გრანდი – "მანჩესტერ იუნაიტედი" და "არსენალი" ინტერესდებიან.

რამოში ამ ეტაპზე პარიზული კლუბის ძირითად შემადგენლობაში ფეხს ვერ იკიდებს და უმეტესად სათადარიგო სკამზეა, რის გამოც მისი წასვლის შანსი გაზრდილია. ძირითადად, მას თამაში მხოლოდ თასის შეხვედრებში და ცვლილებაზე ეძლევა.

მიუხედავად ამისა, პორტუგალიელმა მიმდინარე სეზონში ყველა ტურნირზე 38 შეხვედრაში მიიღო მონაწილეობა და 18 გოლის გატანა მოახერხა. აღსანიშნავია, რომ ჩემპიონთა ლიგაზე მხოლოდ 199 წუთი ითამაშა, თუმცა მაინც შეძლო 3 გოლის გატანა.