პსჟ-ს დომინირების გამო - ფრანგულ ფეხბურთში რევოლუციური ცვლილება იგეგმება

პარიზული კლუბის აშკარა დომინაცია შესაძლოა საფრანგეთის ჩემპიონატის ფორმატის შეცვლის მიზეზი გახდეს — ამის შესახებ ინფორმაციას ავტორიტეტული გამოცემა „L'Équipe“ ავრცელებს.

„პსჟ“-მ საფრანგეთის ლიგა 1-ის ბოლო 13 სეზონიდან 11-ში პირველი ადგილი დაიკავა. გამონაკლისი მხოლოდ 2017 და 2021 წლები იყო, როდესაც ჩემპიონობა „მონაკომ“ და „ლილმა“ მოიპოვეს. სწორედ ამ მონოტონური წარმატების გამო, საფრანგეთის ფეხბურთის ფედერაციის პრეზიდენტი, ფილიპ დიალო ახალი ფორმატის ინიციატივით გამოდის.

„L'Équipe“-ის ცნობით, დიალოს ინიციატივა გულისხმობს ფორმატის შეცვლას და სეზონის ბოლოს პლეი ოფის შემოღებას. ახალი სისტემის მიხედვით, ჩემპიონატის დასასრულს ოთხი საუკეთესო კლუბი ნახევარფინალებსა და ფინალში ტიტულისთვის იბრძოლებს. საბოლოო გამარჯვებული სწორედ ამ გზით განისაზღვრება.

გარდა ამისა, განიხილება პროფესიონალური ლიგის გაუქმების იდეაც და მისი ფუნქციების საფრანგეთის ფეხბურთის ფედერაციაზე გადატანა. ამგვარად, შეიძლება შეიქმნას კლუბების ახალი ასოციაცია, რომელიც სხვა პრინციპებით იმუშავებს.

ინიციატივის მიზანია ჩემპიონატში მეტი კონკურენცია და ინტერესი შეიქმნას. თუმცა უცნობია, როგორ მიიღებს ასეთ ცვლილებებს თავად „პსჟ“, რომელიც ბოლო წლების განმავლობაში საფრანგეთის ჩემპიონატზე თითქმის დაუმარცხებელია.