მხოლოდ 2000 ევროს გამო - ფიფამ მიქაუტაძის ლიონი ძალიან მკაცრად დასაჯა

საფრანგეთის „ლიონს“, რომლის ღირსებასაც საქართველოს ეროვნული ნაკრების ფორვარდი გიორგი მიქაუტაძე იცავს, ფიფამ სერიოზული სანქცია დაუწესა – მომდევნო სამ სატრანსფერო ფანჯარაზე კლუბს ახალი მოთამაშეების რეგისტრაცია ეკრძალება.

ინფორმაციას ავტორიტეტული ფრანგული გამოცემა L’Equipe ავრცელებს.

სასჯელის მიზეზად 2000 ევროს ოდენობის დავალიანება სახელდება, რომელიც კლუბს ტრანსფერებთან დაკავშირებული საკომისიო მომსახურებისთვის უნდა გადაეხადა.

ფიფას ოფიციალურ განცხადებაში ნათქვამია, რომ სანამ ეს ვადა არ ამოიწურება – 2026 წლის ზაფხულამდე – „ლიონს“ აეკრძალება როგორც პროფესიონალი, ისე მოყვარული ფეხბურთელების დარეგისტრირება ეროვნულ და საერთაშორისო დონეზე.

თუმცა, თავად კლუბი პოზიციას არ იზიარებს და ირწმუნება, რომ აღნიშნული დავალიანება უკვე დაფარულია. შესაბამისად, ფიფას მხრიდან დაწესებულ სასჯელს უსაფუძვლოდ მიიჩნევს და გადაწყვეტილების შეცვლას ან სასჯელის გადახედვას ელის.

შეგახსენებთ, რომ „ლიონმა“ მიმდინარე სეზონი ლიგა 1-ში მეექვსე პოზიციაზე დაასრულა და შემდეგ სეზონში ევროპა ლიგაზე იასპარეზებს.