თუ დონარუმა წავა - პარი სენ-ჟერმენმა იტალიელის შემცვლელი უკვე იპოვა

ფრანგული გამოცემა L’Equipe-ის ინფორმაციით, ჯანლუიჯი დონარუმას მომავალი ჯერ კიდევ გაურკვეველია. მიუხედავად იმისა, რომ იტალიელი მეკარის კონტრაქტი „პარი სენ-ჟერმენთან“ 2026 წლამდეა გათვლილი, კლუბსა და ფეხბურთელის აგენტს შორის შეთანხმება კონტრაქტის შესაძლო შეწყვეტაზე უკვე განიხილება.

დონარუმა პარიზულ გრანდს 2021 წელს, „მილანიდან“ თავისუფალი აგენტის სტატუსით შეუერთდა და პირველი სეზონიდანვე გუნდის ძირითადი მეკარე გახდა. თუმცა, მიმდინარე სეზონში მისი თამაში კრიტიკის საგნად არაერთხელ იქცა და გავრცელებული ცნობით, პსჟ დონარუმას საკითხზე სერიოზულად ფიქრობს.

თუ მეკარემ გუნდი დატოვა, მის შემცვლელად ერთ-ერთ კანდიდატად „ლილის“ მეკარე, ლუკას შევალიე განიხილება, რომელიც 2023/24 წლების სეზონში ერთ-ერთ საუკეთესო ფრანგ მეკარედ დასახელდა.

შეგახსენებთ, დონარუმა მიმდინარე საფრანგეთის ჩემპიონატის ერთ-ერთი გამორჩეული მეკარეა, თუმცა კლუბში მისი დარჩენა ამ ეტაპზე საბოლოოდ გადაწყვეტილი არ არის.