იტალიელი ჟურნალისტის შეფასება – ჯორდანოს აზრით, ხვიჩა კვარაცხელიას უმედლოდ დატოვება უსამართლობა იქნება

„გაძეტა დელო სპორტის“ ჟურნალისტმა ანტონიო ჯორდანომ რადიო Marte-ს გადაცემაში Forza Napoli Sempre ხვიჩა კვარაცხელიას შესახებ ისაუბრა და აღნიშნა, რომ ქართველის ტრანსფერმა „ნაპოლიში“ აზრთა სხვადასხვაობა გამოიწვია.

„ჩვენ ნამდვილად დარწმუნებული ვართ, რომ მსგავსი დონის მოთამაშის გაშვებით კლუბმა იხეირა?“ – სვამს კითხვას ჯორდანო და აზრს ამატებს, რომ ხვიჩამ ღრმა კვალი დატოვა იმ გულშემატკივრებში, რომლებსაც მისი დაფასება ბოლო წლებში ნამდვილად შეეძლოთ.

ჟურნალისტის თქმით, კვარაცხელია იმ ფეხბურთელთა კატეგორიას განეკუთვნება, ვინც ჩვეულებრივი ლოგიკის ფარგლებს გარეთ მოქმედებს: „ის გამორჩეული ჩემპიონია. მისი წასვლით ყველა არ გახარებულა – ბევრს გულიც კი დასწყდა“.

ჯორდანოს შეფასებით, თუ „ნაპოლი“ სკუდეტოს მოიგებს, ეს თითქმის სასწაული იქნება: „თუ ვერ მოიგებენ – ეს მოლოდინების გამართლება ვერ იქნება. შედეგს მალე გავიგებთ. მე კი უკვე ვიცი, მაგრამ ახლა არ ვიტყვი (იცინის)“.

დასასრულს, ჯორდანო ფიქრობს, რომ არასწორი იქნება „ნაპოლის“ ჩემპიონად გამოცხადების შემთხვევაში, კვარაცხელიას წვლილი უგულებელვყოთ: „მისი წილი ამ შედეგში არსებობს და ის ამისთვის აღიარებას იმსახურებს“.