ოთარ კიტეიშვილს ზაფხულში ინგლისის პრემიერლიგის გუნდში ვიხილავთ? შანსები იზრდება

საქართველოს ეროვნული ნაკრების წევრმა და გრაცის "შტურმის" ლიდერმა ოთარ კიტეიშვილმა საოცარი სეზონი ჩაატარა — ავსტრიის ჩემპიონატი გუნდთან ერთად მოიგო და ზედიზედ მეორე წელია, ლიგის საუკეთესო მოთამაშედ დაასახელეს.

ავსტრიაში წარმატებული გამოსვლის შემდეგ, 29 წლის ნახევარმცველით ინგლისის პრემიერლიგაში ახლად აღზევებული კლუბები დაინტერესდნენ. გამოცემა Krone-ს ცნობით, კიტეიშვილს "ბარნლი", "სანდერლენდი" და "ლიდსი" აკვირდებიან და მისი ტრანსფერის განხილვა უკვე მიმდინარეობს.

მიმდინარე სეზონში კიტეიშვილმა ყველა ტურნირზე ჯამში 32 მატჩი ჩაატარა, 12 გოლი გაიტანა და 5 შედეგიანი გადაცემა გააკეთა.

შეგახსენებთ, რომ ბოლოს პრემიერლიგაში საქართველოდან ზურაბ ხიზანიშვილმა ითამაშა — მან ინგლისის უმაღლეს დივიზიონში ბოლო მატჩები "ბლექბერნის" რიგებში 2008-2009 წლების სეზონში ჩაატარა.