• 28-04-2022
    რა ნომრით ითამაშებს კვარაცხელია "ნაპოლიში"
    რა ნომრით ითამაშებს კვარაცხელია "ნაპოლიში"

    როგორც მოგეხსენებათ, იტალიური "ნაპოლის" პრეზიდენტმა, აურელიანო დე ლაურენტისმა დაადასტურა, რომ ხვიჩა კვარაცხელია მომდევნო სეზონიდან დიეგო მარადონას სახელობის არენაზე ითამაშებს.


    ზაფხულის სატრანსფერო ფანჯრის გახსნამდე კიდევ დიდი დროა დარჩენილი, ამიტომ კვარა ჯერ ბათუმის "დინამოზეა" ორიენტირებული, თუმცა ეს გულშემატკივრებს არ ეხებათ - ხვიჩას ქომაგებმა უკვე დაიწყეს ფიქრი იმაზე, როგორი იქნება ქართველი შემტევის ნეაპოლიტანური თავგადასავალი.


    ერთ-ერთი ყველაზე საინტერესო კითხვა, რაც გვაწუხებს, შემდეგია: რა ნომრით ითამაშებს ხვიჩა "ნაპოლიში"?


    ამაზე პრესაში ჯერ არაფერი თქმულა, თუმცა გარკვეული დასკვნის გამოტანა ჩვენითაც შეგვიძლია, რადგან თავისი საკლუბო კარიერის მანძილზე ახალგაზრდა ფეხბურთელი სულ 3 სხვადასხვა ნომრით ასპარეზობდა:


    18 - დინამო თბილისი


    21 - რუსთავი, ლოკომოტივ მოსკოვი, რუბინი


    20 - დინამო ბათუმი


    "ნაპოლიში" 21 ნომერი ახლა მატეო პოლიტანოს აქვს დაკავებული, 20 ნომრით კი პიოტრ ზიელინსკი თამაშობს. მაშასადამე, ერთადერთი თავისუფალი ნომერი, რომელიც კვარაცხელიასთვისაც ნაცნობია, 18 გახლავთ.


    ბუნებრივია, არსებობს შანსი, "პარტენოპეი" ზაფხულში რომელიმე ფეხბურთელმა დატოვოს და ხვიჩას სხვა ოფციებიც გამოუჩნდეს, თუმცა დღეს ყველაზე რეალურ ვარიანტად ნომერი 18 უნდა მივიჩნიოთ.

    Facebook კომენტარები