იტალიურმა Italpress-მა სერია ა-ს ტრადიციული შუასასეზონო გამოკითხვა ჩაატარა და ჩემპიონატში მონაწილე 17 გუნდის ("მილანმა", "ლაციომ" და "მონცამ" გამოკითხვაში მონაწილეობა არ მიიღეს) მთავარ მწვრთნელს რამდენიმე შეკითხვა დაუსვა.

ბუნებრივია, მთავარი შეკითხვა ჩემპიონობის ფავორიტს ეხებოდა. მწვრთნელთა უმეტესობამ თავისი არჩევანი "ნაპოლიზე" შეაჩერა. "პარტენოპეიმ" 17-დან 14 ხმა მიიღო. 

ნეაპოლელთა თავკაც ლუჩიანო სპალეტის თავიდანვე გაცხადებული ჰქონდა, რომ ხმას თავის გუნდსა და მის ფეხბურთელებს არ მისცემდა. სწორედ ამიტომ შეიკავა სპალეტიმ თავი ჩემპიონობის ფავორიტის დასახელებისგან, სეზონის აღმოჩენობა კი არა ხვიჩა კვარაცხელიას, არამედ "ემპოლის" შემტევ ტომაზო ბალდანცის უწინასწარმეტყველა.

სპალეტის ხმა კვარას დიდად არ დაკლებია, რადგან მწვრთნელთა უმეტესობამ მაინც ქართველზე შეაჩერა არჩევანი. ხვიჩას სერია ა-ს სეზონის აღმოჩენად დასახელებას შემდეგი 10 სპეციალისტი ელოდება:

ტიაგო მოტა (ბოლონია), დავიდე ბალარდინი (კრემონეზე), ვინჩენცო იტალიანო (ფიორენტინა), სიმონე ინძაგი (ინტერი), სტეფანო პიოლი (მილანი), ალესიო დიონიზი (სასუოლო), ლუკა გოტი (სპეცია), ივან იურიჩი (ტორინო), ანდრეა სოტილი (უდინეზე) და მარკო ძაფარონი (ვერონა).

აქვე შეგახსენებთ, რომ იტალიის ჩემპიონატის მიმდინარე სეზონში კვარაცხელიას მონაგარი 7 გოლსა და 7 საგოლე გადაცემას შეადგენს. მომდევნო მატჩს ხვიჩა და "ნაპოლი" 29 იანვარს, "რომას" წინააღმდეგ ჩაატარებენ.